ກໍ່ສ້າງເຂດປົກຄອງເສດຖະກິດພິເສດຢູ່ ຫວຽດນາມ

(vovworld)- ເລື່ອງສ້າງຕັ້ງ ແລະ ພັດທະນາບັນດາເຂດປົກຄອງເສດຖະກິດພິເສດ ຫລື ເອີ້ນວ່າ ບັນດາເຂດເສດຖະກິດເສລີ ແມ່ນຮູບແບບທີ່ຫລາຍປະເທດໄດ້ຮູ້ຈັກເຖິງມາແຕ່ດົນນານ ແລ້ວ.

(vovworld)- ເລື່ອງສ້າງຕັ້ງ ແລະ ພັດທະນາບັນດາເຂດປົກຄອງເສດຖະກິດພິເສດ ຫລື ເອີ້ນວ່າ ບັນດາເຂດເສດຖະກິດເສລີ ແມ່ນຮູບແບບທີ່ຫລາຍປະເທດໄດ້ຮູ້ຈັກເຖິງມາແຕ່ດົນນານ ແລ້ວ. ເຖິງຢ່າງໃດກໍຕາມ, ນີ້ແມ່ນຮູບແບບໃຫມ່ອ່ຽມຢູ່ຫວຽດນາມ. ເລື່ອງສ້າງຕັ້ງ ແລະ ພັດທະນາບັນດາເຂດປົກຄອງເສດຖະກິດພິເສດຢູ່ຫວຽດນາມ ຈະສ້າງບັນດາເຂດເສດຖະກິດທີ່ຂະຫຍັນຂັນເຄື່ອນ, ເສລີ ດ້ວຍການໃຫ້ບຸລິມະສິດພົ້ນເດັ່ນຫລາຍຢ່າງ, ຈາກນັ້ນ ແຜ່ຂະຫຍາຍເຖິງບັນດາເຂດເສດຖະກິດອື່ນ.

ແນວຄວາມຄິດກໍ່ສ້າງ ແລະ ພັດທະນາເຂດປົກຄອງເສດຖະກິດພິເສດຢູ່ ຫວຽດນາມ ຖືກຍົກອອກມາໃນກອງປະຊຸມສູນກາງພັກກອມມູນິດຫວຽດນາມ ຄັ້ງທີ 4 ຊຸດທີ 8 ປີ 1997. ຜ່ານກວ່າ 16 ປີແຫ່ງການຄົ້ນຄ້ວາ, ກໍ່ສ້າງທົດລອງ ແລະ ພັດທະນາບັນດາເຂດເສດຖະກິດເປີດ, ເຂດເສດຖະກິດແຄມທະເລ, ລັດຫວຽດນາມ ໄດ້ມີແຜນນະໂຍບາຍສະເຫມີຕົ້ນສະເຫມີປາຍກ່ຽວກັບການກໍ່ສ້າງເຂດປົກຄອງເສດຖະກິດພິເສດ, ເພື່ອສ້າງຮູບແບບການເຕີບໂຕ ແລະ ປະຕິບັດລະບອບໃຫມ່. ບັນດາເຂດທີ່ໄດ້ຮັບການເລືອກເຟັ້ນເພື່ອກໍ່ສ້າງ ເຂດປົກຄອງເສດຖະກິດພິເສດ ລວມມີ: ເມືອງເກາະ ເວີນດົນ ຢູ່ ແຂວງ ກວ໋າງນີງ, ເມືອງເກາະ ຟູກວກ ຢູ່ແຂວງ ກຽນຢາງ ແລະ ອ່າວ ເວີນຟອງ ຢູ່ແຂວງ ແຄງຮ່ວາ. ເລື່ອງເລືອກເຟັ້ນສະຖານທີ່ກໍ່ສ້າງບັນດາ ເຂດປົກຄອງເສດຖະກິດພິເສດສ່ວນຫລາຍແມ່ນອີງໃສ່ທ່າໄດ້ປຽບດ້ານພູມສາດ-ເສດຖະກິດຂອງບັນດາເຂດນີ້. ຕາມນັ້ນແລ້ວ, ເວີນດົນ, ຟູກວກ ແລະ ອ່າວ ເວີນຟອງ ລ້ວນແຕ່ແມ່ນສະຖານທີ່ມີທິວທັດທຳມະຊາດສວຍງາມພິເສດ, ມີຄວາມສາມາດບົ່ມຊ້ອນກ່ຽວກັບການທ່ອງທ່ຽວ. ນອກນັ້ນ, 3 ເຂດດັ່ງກ່າວ ລ້ວນແຕ່ນອນໃນເສັ້ນທາງຄົມມະນາຄົມແຄມທະເລ, ຫລືນອນໃນເສັ້ນທາງເຊື່ອມຕໍ່ພາກພື້ນ ແລະ ໂລກ. ທ່ານ ເວືອງດີງເຫ້ວ, ຫົວຫນ້າຄະນະເສດຖະກິດສູນກາງໃຫ້ຮູ້ວ່າ:

“ແຜນນະໂຍບາຍຂອງພັກ ແລະ ລັດ ບົນພື້ນຖານທ່າໄດ້ປຽບຂອງຫວຽດນາມ ກ່ຽວກັບເສດຖະກິດທະເລ, ໝູ່ເກາະ, ພວກເຮົາຈະສ້າງຕັ້ງ ແລະ ພັດທະນາເຂດເສດຖະກິດພິເສດຈຳນວນຫນຶ່ງ ຫລື ເຂດເສດຖະກິດພິເສດ ແລະ ປົກຄອງ ດ້ວຍຈຸດປະສົງສຳຄັນແມ່ນສ້າງການຈະເລີນເຕີບໂຕເພື່ອກະຕຸກຊຸກຍູ້ພັດທະນາເສດຖະກິດເຂດຕ່າງໆ ແລະ ແຜ່ຂະຫຍາຍໄປທົ່ວປະເທດ. ຈຸດໝາຍທີສອງຂອງການພັດທະນາ ເຂດປົກຄອງເສດຖະກິດພິເສດ ແມ່ນການປະຕິບັດທົດລອງບັນດານະໂຍບາຍ ແລະ ລະບອບທີ່ມີລັກສະນະບຸກທະລຸ ຫລັງຈາກນັ້ນ ສາມາດນຳໃຊ້ໃຫ້ແກ່ທົ່ວປະເທດໄດ້.”

ເຂດເສດຖະກິດ ເວີນດົນ
ພາບ:internet

ຕາມແຜນນະໂຍບາຍນີ້, ໃນຫລາຍປີມານີ້, ເວີນດົນ, ຟູກວກ ແລະ ເວີນຟອງໄດ້ພັດທະນາຕາມທິດ ຈະກາຍເປັນເຂດປົກຄອງເສດຖະກິດພິເສດ. ປະຈຸບັນ, ເຂດເສດຖະກິດເວີນຟອງ ມີ 79 ໂຄງການລົງທຶນ ດ້ວຍຍອດຈຳນວນທຶນຈົດທະບຽນບັນລຸ 9.400 ຕື້ດົ່ງ. ມາຮອດປະຈຸບັນ, ເຂດລະຫລິ້ນບັນເທິງປະສົມທີ່ມີລາງວັນ ແມ່ນສ່ວນຫນຶ່ງໃນການວາງແຜນກຳນົດສັງລວມຢູ່ເຂດເສດຖະກິດ ເວີນດົນ ໂດຍທ່ານນາຍົກລັດຖະມົນຕີ ອະນຸຍາດໃຫ້ກໍ່ສ້າງ. ແຂວງ ກວ໋າງນີງ ກໍໄດ້ດຶງດູດທຶນໃຫ້ແກ່ໂຄງການກໍ່ສ້າງສະຫນາມບິນ ສາກົນ ເວີນດົນ ດ້ວຍມູນຄ່າປະມານ 1 ຕື້ USD. ນັກລົງທຶນພາຍໃນ ແລະ ຕ່າງປະເທດ ຫລາຍທ່ານ ມີຄວາມສົນໃຈເຖິງການລົງທຶນເຂົ້າເຂດເສດຖະກິດນີ້. ທ່ານ ຫງວຽນຫືວຖູຍ, ປະທານ ສະມາຄົມນັກທຸລະກິດຫນຸ່ມ ແຂວງ ກວ໋າງນີງ ໃຫ້ຮູ້ວ່າ:

“ການລົງທຶນຢູ່ ເວີນດົນ ແມ່ນຄວາມປາດຖະຫນາຂອງບັນດານັກທຸລະກິດ ແລະ ພິເສດ ແມ່ນນັກທຸລະກິດຫນຸ່ມ. ໃນສະມາຄົມນັກທຸລະກິດຫນຸ່ມ, ມີບາງຄົນໄດ້ລົງທຶນດ້ວຍຂອບຂະຫນາດໃຫຍ່ ແລະ ໃນເວລາຍາວຢູ່ ເວີນດົນ. ໂດຍແມ່ນຜູ້ທຳອິດລົງທຶນເຂົ້າເວີນດົນ, ສະນັ້ນ ຂ້າພະເຈົ້າມີຄວາມປາດຖະຫນາ ແລະ ສົນໃຈທີ່ສຸດເຖິງບັນດາລາຍການສົ່ງເສີມການລົງທຶນເພື່ອໃຫ້ເວີນດົນ ພັດທະນາ.”

ໃນຂະນະນັ້ນ, ແຂວງ ແຄງຮ່ວາ ພວມຊຸກຍູ້ບັນດາບາດກ້າວເພື່ອສ້າງ ເຂດປົກຄອງເສດຖະກິດພິເສດ ເວີນຟອງ. ໄລ່ມາຮອດຈຸດເວລານີ້, ເຂດເສດຖະກິດເວີນຟອງ ໄດ້ດຶງດູດ 126 ໂຄງການຕົ້ນຕໍ ໃນຂົງເຂດອຸດສາຫະກຳຫນັກ, ອຸດສາຫະກຳສຳຮອງ. ສຳລັບ ເຂດປົກຄອງເສດຖະກິດພິເສດ ຟູກວກ, ຄາດວ່າ ໃນປີ 2020, ຟູກວກ ຈະກາຍເປັນສູນການເງິນ ທີ່ດຶງດູດການລົງທຶນຈາກບັນດາກຸ່ມເສດຖະກິດນາໆຊາດເປັນຈຳນວນຫລວງຫລາຍ.

ເປັນອັນວ່າ, ບັນດາ ເຂດປົກຄອງເສດຖະກິດພິເສດຢູ່ຫວຽດນາມ ພວມໃນໄລຍະເລີ່ມຕົ້ນສ້າງຕັ້ງ. ທ່ານ ເວືອງດີງເຫ້ວ ໃຫ້ຮູ້ຕື່ມອີກວ່າ:

“ເພື່ອສ້າງຕັ້ງບັນດາເຂດປົກຄອງເສດຖະກິດພິເສດນີ້, ຕາມພວກຂ້າພະເຈົ້າແລ້ວ ຕ້ອງມີບັນດາມາດຕະການ, ກ່ອນອື່ນໝົດຕ້ອງກໍ່ສ້າງ ແລະ ຮັບຮອງເອົາກົດໝາຍກ່ຽວກັບ ເຂດປົກຄອງເສດຖະກິດພິເສດ ກົດໝາຍສະບັບນີ້ຖືກສ້າງຂຶ້ນໃນໂຄງການສ້າງກົດໝາຍຂອງສະພາແຫ່ງຊາດ ພາຍຫລັງທີ່ຫວຽດນາມ ໄດ້ຮັບຮອງເອົາລັດຖະທຳມະນູນປີ 2013. ທີສອງ ພວກເຮົາຕ້ອງສ້າງບັນດາລະບອບນະໂຍບາຍ ກ່ຽວກັບດ້ານບໍລິຫານ ແລະ ເສດຖະກິດ ຢ່າງກ້າວກະໂທດ ແລະ ມີລັກສະນະແກ້ງແຍ້ງໃນພາກພື້ນ ແລະ ພາຍໃນປະເທດ ໃຫ້ແກ່ບັນດາເຂດເສດຖະກິດພິເສດຂອງຫວຽດນາມ. ທີ 3 ພວກເຮົາຕ້ອງຊອກຫາ ແລະ ແນະນຳ ໃຫ້ບັນດານັກລົງທຶນສະຖານທີ່ມີທ່າໄດ້ປຽບກ່ຽວກັບພູມສາດດ້ານເສດຖະກິດ ແລະ ສຳຫລວດຢ່າງລະອຽດ, ພ້ອມທັງ ໂຄສະນາໃຫ້ແກ່ຕ່າງປະເທດ. ຫນຶ່ງໃນບັນດາປັດໄຈສຳຄັນສຳລັບການສ້າງຕັ້ງ ແລະ ພັດທະນາບັນດາ ເຂດ ເສດຖະກິດພິເສດ ນັ້ນແມ່ນຊອກຫາບັນດານັກລົງທຶນຍຸດທະສາດ.”

ຜົນສະທ້ອນ ກໍ່ຄືຄວາມສຳຄັນກ່ຽວກັບທ່າແຮງຂອງບັນດາ ເຂດປົກຄອງເສດຖະກິດພິເສດ ຢູ່ ຫວຽດນາມ ຈະໄດ້ຮັບການຢັ້ງຢືນໃນພຶດຕິກຳຕົວຈິງ. ເລື່ອງສ້າງຕັ້ງບັນດາ ເຂດປົກຄອງເສດຖະກິດພິເສດໃນໄລຍະຈະມາເຖິງ ຈະແຜ່ຂະຫຍາຍເຖິງບັນດາທ້ອງຖິ່ນອື່ນ, ປະກອບສ່ວນເຮັດໃຫ້ພື້ນຖານເສດຖະກິດຫວຽດນາມ ພັດທະນາຢ່າງຂະຫຍັນຂັນເຄ່ື່ອນ ແລະ ມີປະສິດທິຜົນກວ່າ.