ដូចទៅនឹងប្រធានបទ“កាឡាក់ស៊ីបញ្ចេញពន្លឺចែងចាំង” ពានរង្វាន់ខ្លែងមាសបានប្រមូលផ្តុំសិល្បករល្បីៗ សិល្បករវ័យក្មេងទូទាំងប្រទេសដែលមានទេពកោសល្យក្នុងវិស័យភាពយន្ត។ ពានរង្វាន់ខ្លែងមាសឆ្នាំនេះបានទាក់ទាញស្នាដៃចូលរួមជិត ១៦០ ដែលក្នុងនោះ ប្រភេទភាពយន្តមាន ១៦ ស្នាដៃ។ នៅក្នុងពិធីប្រគល់រង្វាន់ គណៈកម្មាធិការរៀបចំបានប្រគល់រង្វាន់ខ្លែងមាសចំនួន ៧ រង្វាន់ និងខ្លែងប្រាក់ចំនួន ១៣ រង្វាន់។ ក្នុងនោះ ភាពយន្ត និងរឿងភាគទូរទស្សន៍ គឺជាប្រភេទភាពយន្តទាំងពីរដែលទស្សនិកជនទន្ទឹងរង់ចាំបំផុតនៅក្នុងពិធីប្រគល់ពានរង្វាន់។ នៅក្នុងប្រភេទភាពយន្ត ពានរង្វាន់ខ្លែងមាសត្រូវបានប្រគល់ជូនដល់ខ្សែភាពយន្ត “Tro tan ruc ro” (Brilliant Ashes) របស់អ្នកដឹកនាំរឿង Bui Thac Chuyen។ ភាពយន្តនេះក៏បានទទួលបានពានរង្វាន់ចំនួន ៣ ផ្សេងទៀតផងដែរ។

នៅក្នុងប្រភេទភាពយន្ត ពានរង្វាន់ខ្លែងមាសត្រូវបានប្រគល់ជូនដល់ខ្សែភាពយន្ត “Tro tan ruc ro” (Brilliant Ashes) របស់អ្នកដឹកនាំរឿង Bui Thac Chuyen។ រូបថត៖ Dang Tuan/TTXVN

"Brilliant Ashes" ត្រូវបានយកលំនាំពីសាច់រឿងខ្លីចំនួនពីររបស់អ្នកនិពន្ធ Nguyen Ngoc Tu។ អ្នកដឹកនាំរឿង Bui Thac Chuyen បានត្រៀមសម្រាប់ខ្សែភាពយន្តនេះអស់រយៈពេលជិត ១០ ឆ្នាំមកហើយ។ យកលំនាំពីទីតាំងភូមិក្រីក្រមួយនៅតាមមាត់បឹងបួរនៅតំបន់ដី Ca Mau សាច់រឿងខ្សែភាពយន្តនេះនិយាយអំពីស្ត្រីបីនាក់ដែលមានជីវិតស្នេហាមិនធម្មតាដូចគេដូចឯង។ ដោយប្រើពណ៌ខ្សែភាពយន្តដូចជាពណ៌ប្រផេះ រួមផ្សំជាមួយនឹងចង្វាក់យឺត "Brilliant Ashes" នាំយើងទៅស្វែងយល់ពីអារម្មណ៍របស់ប្រជាជនក្រីក្រនៅតំបន់មាត់បឹងបួរ។ អ្នកដឹកនាំរឿង Bui Thac Chuyen បានប្រើប្រាស់យ៉ាងហ្មត់ចត់នូវអារម្មណ៍លាក់កំបាំងរវាងតួអង្គសំខាន់ៗនៃខ្សែភាពយន្ត។ អ្នកដឹកនាំរឿង Bui Thac Chuyen បានចែករំលែកថា៖ “ខ្ញុំពិតជាសប្បាយរីករាយណាស់ដែលភាពយន្តនេះទាក់ទាញអារម្មណ៍របស់ទស្សនិកជន។ ខ្ញុំសូមថ្លែងអំណរគុណដល់សហការីដែលបានផលិតភាពយន្តជាមួយខ្ញុំចំពេលមានការលំបាកដែលបណ្តាលមកពីជំងឺរាតត្បាតកូវីដ-១៩ ដោយការជក់ចិត្តនឹងអាជីពរបស់ខ្លួន។ ជាពិសេស ខ្ញុំសូមថ្លែងអំណរគុណយ៉ាងជ្រាលជ្រៅចំពោះទស្សនិកជនដែលនិយមចូលចិត្តភាពយន្ត។ នេះជាការលើកទឹកចិត្តដ៏ល្អមួយសម្រាប់ខ្ញុំ និងសហការី។ ពានរង្វាន់ខ្លែងមាសពិតជាបានលើកទឹកចិត្តដល់ពួកយើងដែរ”។

ក្នុងប្រភេទភាពយន្តភាគទូរទស្សន៍ ភាពយន្តរឿង “ម្តាយចំបើង” ដឹកនាំដោយលោក Nguyen Phuong Dien បានឈ្នះពានរង្វាន់ខ្លែងមាស។ សាច់រឿងនៃខ្សែភាពយន្តនិយាយអំពីប្រជាជនក្នុងភូមិក្រីក្រជាមួយនឹងរឿងជីវិតសាមញ្ញ។ ខ្សែភាពយន្តនេះបានធ្វើឱ្យទស្សនិកជនស្រក់ទឹកភ្នែកជាមួយនឹងព័ត៌មានលម្អិតដ៏គួរ ឱ្យចាប់អារម្មណ៍ជាច្រើនតាមរយៈការសម្តែងរបស់តួសម្តែងដែលមានទេពកោសល្យ។ តួអង្គសំខាន់ក្នុងរឿង "ម្តាយចំបើង" គឺ “លោក Mo គម” ជាបុរសកំសត់កំព្រាវេទនា តស៊ូរកស៊ីយ៉ាងលំបាករាប់មិនអស់ ដែលសម្តែងដោសិល្បករ Thai Hoa។ អ្នកដឹកនាំរឿង Nguyen Phuong Dien ចែករំលែកថា៖ “លោក Mo គម គ្មានអ្វីអស្ចារ្យទេ មានតែចិត្តអធ្យាស្រ័យ ស្មោះត្រង់ រស់នៅដើម្បីអ្នកដទៃ។ នោះហើយជាអ្វីដែលខ្ញុំចូលចិត្ត តួរអង្គ Mo គម ហើយតែងតែស្វែងរកវិធីដើម្បីរស់នៅជាមួយអារម្មណ៍របស់តួអង្គ។ អ្នកដឹកនាំរឿង Nguyen Phuong Dien បានឲ្យដឹងថា៖

“ជាកិត្តិយស និងការរំភើបមួយ នៅពេលដែលខ្សែភាពយន្តនេះត្រូវបានលើកតម្កើងក្នុងពិធីប្រគល់ពានរង្វាន់ខ្នែងមាសឆ្នាំ ២០២៣។ ការលំបាក ការខិតខំប្រឹងប្រែង និងភាពជោគជ័យរបស់ក្រុមទាំងមូល ត្រូវបានលើកតម្កើងនៅក្នុងពានរង្វាន់ខ្លែងមាសលើកនេះ។ តាងនាមឱ្យក្រុមការងារភាពយន្ត រូបខ្ញុំផ្ទាល់សូមថ្លែងអំណរគុណចំពោះតារាសម្ដែងទាំងអស់ដែលបានលះបង់កម្លាំងកាយចិត្តក្នុងការបំពេញតួនាទីរបស់ខ្លួន បង្កើតឡើងស្នាដៃភាពយន្តភាគទូរទស្សន៍ "ម្តាយចំបើង"។

ពានរង្វាន់តួឯកស្រីឆ្នើមក្នុងរឿងភាគបានទៅនាង Thu Trang ដើរតួរជាកញ្ញា Nhot ក្នុងរឿង "អា Nhot ទន្ទឹងរងចាំប្តី"។ រូបថត៖ Dang Tuan/TTXVN

នៅក្នុងផ្នែកភាពយន្តភាគទូរទស្សន៍ ខ្សែភាពយន្ត "តើអ្នកជាបុរសម៉ែនទេ?" បានឈ្នះពានរង្វាន់ចំនួនបួនផងដែរ។ ជាមួយគ្នានោះ ពានរង្វាន់ខ្នែងមាសឆ្នាំនេះបានលើកតន្កើងដល់សិល្បករ Thai Hoa នៅពេលដែលគាត់ទទួលបានពានរង្វាន់ជាតួសម្តែងល្អបំផុតទាំងក្នុងរឿងភាគទូរទស្សន៍។ ក្នុងប្រភេទតួឯកស្រីឆ្នើមក្នុងរឿងភាគទូរទស្សន៍ សិល្បការិនី Quynh Nguyen បានឈ្នះពានរង្វាន់តួឯកស្រីឆ្នើមសម្រាប់តួរអង្គ Hanh ក្នុងរឿង "កុំធ្វើឱ្យម៉ាក់ខឹង"។ ទន្ទឹមនឹងនោះ ពានរង្វាន់តួឯកស្រីឆ្នើមក្នុងរឿងភាគបានទៅនាង Thu Trang ដើរតួរជាកញ្ញា Nhot ក្នុងរឿង "អា Nhot ទន្ទឹងរងចាំប្តី"។ សិល្បការិនី Thu Trang បានចែករំលែក៖

“ខ្ញុំពិតជាមានកិត្តិយសណាស់ដែលបានឈរនៅលើឆាកនេះនៅថ្ងៃនេះ។ អរគុណក្រុមការងារដែលបានជួយឲ្យខ្សែភាពយន្តភាគនេះ ទទួលបានការស្រឡាញ់រាប់អានពីទស្សនិកជន... ទើបថ្ងៃនេះខ្ញុំអាចទទួលបានពានរង្វាន់ដ៏មានកិត្យានុភាពនេះ”។

ក្នុងប្រភេទពានរង្វាន់ និងប្រភេទសិល្បករ ស្នាដៃទទួលបានពានរង្វាន់ខ្លែងឆ្នាំ ២០២៣ គឺពានរង្វាន់ឆ្នើមប្រភេទភាពយន្តឯកសារត្រូវបានប្រគល់ជូនចំពោះភាពយន្ត “អន្ទាក់” ដឹកនាំដោយលោក Nguyen Ho Tri; សាស្ត្រាចារ្យរង លោកបណ្ឌិត Do Lenh Hong Tu ប្រធានសមាគមភាពយន្ត វៀតណាមបានឈ្នះពានរង្វាន់សម្រាប់ប្រភេទស្រាវជ្រាវទ្រឹស្តី និងការរិះគន់ភាពយន្ត; ចំណាត់ថ្នាក់អ្នកនិពន្ធរឿងឆ្នើម អ្នកដឹកនាំរឿង និងអ្នកផលិតភាពយន្តសម្រាប់ខ្សែភាពយន្តភាគទូរទស្សន៍បានទៅអ្នកនិពន្ធ Luong Kim Lien និង Nguyen Thi Ngoc Bich ក្នុងរឿង "ម្តាយចំបើង" និង Trinh Le Phong អ្នកដឹកនាំរឿង "តើអ្នកជាបុរសម៉ែនទេ?"; អ្នកនិពន្ធរឿងល្អបំផុត និងជាអ្នកដឹកនាំរឿងសម្រាប់ខ្សែភាពយន្តភាគមួយ បានទៅខ្សែភាពយន្ត "ផ្ទះ លោកយាយ Nữ" របស់អ្នកដឹកនាំរឿង Tran Thanh។

យោងតាមក្រុមអ្នកស្រាវជ្រាវ ពានរង្វាន់ខ្លែងមាសឆ្នាំ ២០១៣នេះ បានឆ្លុះបញ្ចាំងពីភាពចម្រុះនៃប្រធានបទ និងវិធីនៃការបញ្ចេញមតិរបស់ផលិតករភាពយន្តវៀតណាម។ ផលិតករភាពយន្ត អ្នកដឹកនាំរឿង តួសម្តែង... មានការទម្លុះទម្លាយនូវប្រធានបទ ការសម្តែង ក៏ដូចជាការច្នៃប្រឌិតសិល្បៈក្នុងស្នាដៃនីមួយៗ។ ភាពយន្តវៀតណាមកំពុងខិតជិតនិន្នាការសិល្បៈច្នៃប្រឌិត និងភាពយន្តរបស់ពិភពលោក ដែលរួមចំណែកបន្តិចម្តងៗ ក្នុងការលើកតម្កើងភាពយន្តវៀតណាមហោះទៅកាន់តែឆ្ងាយៗ៕