មេដឹកនាំនៃប្រទេសសមាជិកសហភាពអឺរ៉ុបចំនួន ២៧ បានបើកកិច្ចប្រជុំកំពូលរយៈពេលពីរថ្ងៃ ចាប់ពីថ្ងៃទី ១៩-២០ ខែមីនា នៅទីក្រុងព្រុចសែល ប្រទេសបែលហ្ស៊ិក ដោយផ្តោតលើការលើកកម្ពស់សមត្ថភាពប្រកួតប្រជែងរបស់ប្លុកនេះ និងការជួយឧបត្ថម្ភអ៊ុយក្រែន។ ទោះជាយ៉ាងណាក៏ដោយ ការវិវឌ្ឍនៅទូទាំងពិភពលោក បានបង្ខំឱ្យប្លុកនេះ ផ្លាស់ប្តូរអាទិភាពរបស់ខ្លួន។

សម្ពាធពីមជ្ឈិមបូព៌ា

នៅថ្ងៃទី ១៩ ខែមីនា ដែលជាថ្ងៃដំបូងនៃកិច្ចប្រជុំមេដឹកនាំសហភាពអឺរ៉ុបនៅទីក្រុងព្រុចសែល ធនាគារកណ្តាលអឺរ៉ុប (ECB) បានប្រកាសកាត់បន្ថយការព្យាករណ៍កំណើន និងបង្កើនការព្យាករណ៍អតិផរណាសម្រាប់ឆ្នាំ ២០២៦។ ជាក់ស្តែង ធនាគារកណ្តាលអឺរ៉ុប (ECB) បានព្យាករណ៍ថា កំណើនផលិតផលក្នុងស្រុកសរុប (GDP) របស់តំបន់ចាយប្រាក់អឺរ៉ូនឹងឈានដល់ ០,៩% នៅឆ្នាំនេះ ធ្លាក់ចុះពីការព្យាករណ៍ ១,២% ក្នុងខែធ្នូ ឆ្នាំ២០២៥។ ទន្ទឹមនឹងនោះ ធនាគារកណ្តាលអឺរ៉ុបក៏បានដំឡើងការព្យាករណ៍អតិផរណារហូតដល់ ២,៦% នៅឆ្នាំនេះដែលខ្ពស់ជាងការព្យាករណ៍ ១,៩% ក្នុងខែធ្នូ ឆ្នាំ២០២៥។ ការកែសម្រួលទាំង នេះ ឆ្លុះបញ្ចាំងពីឥទ្ធិពលជាសកលនៃជម្លោះមជ្ឈិមបូព៌ា មកលើទីផ្សារទំនិញ ប្រាក់ចំណូលជាក់ស្តែង និងទំនុកចិត្តរបស់វិនិយោគិន ដែលក្នុងនោះ អឺរ៉ុបគឺជាតំបន់ដែលរងផលប៉ះពាល់ខ្លាំងបំផុត ដោយសារតែការពឹងផ្អែកលើប្រភពឧស្ម័នធម្មជាតិរាវ (LNG) នាំចូលពីតំបន់ឈូងសមុទ្រ។ តម្លៃ LNG នៅអឺរ៉ុបបានកើនឡើង ៣៥% គិតត្រឹមថ្ងៃទី ១៩ មីនា ហើយប្រសិនបើតម្លៃបន្តកើនឡើងនោះ ទ្វីបនេះមានលទ្ធភាពតិចតួចណាស់ក្នុងការឆ្លើយតប។ លោក Marcel Fratzscher ប្រធានវិទ្យាស្ថានសេដ្ឋកិច្ចអាល្លឺម៉ង់ (DIW) បានវាយតម្លៃថា៖ “ទាក់ទងនឹងផលប៉ះពាល់សេដ្ឋកិច្ចលើប្រទេសអាល្លឺម៉ង់ និងទ្វីបអឺរ៉ុបនោះ គឺជម្លោះនៅមជ្ឈិមបូព៌ាអូសបន្លាយយូរប៉ុណ្ណា មិនសំខាន់ដូចនឹងអ្វីដែលកំពុងកើតឡើងនៅច្រកសមុទ្រ Hormuz នោះទេ។ តើច្រកសមុទ្រនេះ នឹងត្រូវបានបើកឡើងវិញ និងបើកជាប្រចាំសម្រាប់ការនាំចេញប្រេងនិងឧស្ម័នដែរឬទេ? ប្រសិនបើរឿងនោះកើតឡើង តម្លៃអាចធ្លាក់ចុះយ៉ាងឆាប់រហ័ស ហើយអឺរ៉ុបនឹងមិនមើលឃើញតម្លៃប្រេងនិងឧស្ម័នហក់ឡើងខ្ពស់ដូចបច្ចុប្បន្នឡើយ។ ប្រការនោះនឹងជួយបន្ថយសម្ពាធយ៉ាងខ្លាំងសម្រាប់សេដ្ឋកិច្ចអឺរ៉ុប”។

ទោះជាយ៉ាងណាក៏ដោយ សម្រាប់អឺរ៉ុប ជម្លោះនៅមជ្ឈិមបូព៌ាមិនគ្រាន់តែជាបញ្ហាសេដ្ឋកិច្ចនោះទេ។ ការរិះគន់ និងការគំរាមកំហែងពីប្រធានាធិបតីអាមេរិក លោក Donald Trump ប្រឆាំងនឹងសម្ព័ន្ធមិត្តអឺរ៉ុបដែលមិនគាំទ្រសហរដ្ឋអាមេរិកក្នុងជម្លោះជាមួយអ៊ីរ៉ង់ បានបង្ខំឱ្យអឺរ៉ុបមានប្រតិកម្មដោយប្រុងប្រយ័ត្ន ដើម្បីមិនធ្លាក់ចូលក្នុងជម្លោះដែលខ្លួនមិនចង់បានផង និងមិនធ្វើឱ្យទំនាក់ទំនងដែលកំពុងជួបការលំបាកជាមួយអាមេរិក កាន់តែអាក្រក់ទៅផងដែរ។ អ្នកជំនាញ Fabian Zuleeg នាយកប្រតិបត្តិនៃមជ្ឈមណ្ឌលគោលនយោបាយអឺរ៉ុប (EPC) នៅទីក្រុងព្រុចសែល បានលើកឡើងថា៖ "ខ្ញុំគិតថា ជំនួសឱ្យការពិភាក្សាអំពីគោលនយោបាយរយៈពេលវែងដែលមានលក្ខណៈស្ថាបនា មេដឹកនាំអឺរ៉ុបឥឡូវនេះត្រូវការពិភាក្សាអំពីអ្វីដែលកំពុងកើតឡើង ហើយខិតខំសម្រេចបានទស្សនៈសមហេតុផល ដែលប្រទេសសមាជិកភាគច្រើនបានយល់ព្រម។ យើងអាចមើលឃើញរឿងនេះ នៅក្នុងការសម្រេចចិត្តរបស់អឺរ៉ុបថា មិនគាំទ្រលោក Donald Trump នៅក្នុងជម្លោះនៅមជ្ឈិមបូព៌ា នាពេលបច្ចុប្បន្នឡើយ"។

ការបែកបាក់គ្នាជុំវិញបញ្ហាអ៊ុយក្រែន

ជម្លោះនៅមជ្ឈិមបូព៌ា និងបញ្ហាថាមពលក៏កំពុងធ្វើឱ្យស្មុគស្មាញបន្ថែមទៀតដល់អាទិភាពកំពូលមួយនៅក្នុងកិច្ចប្រជុំកំពូលសហភាពអឺរ៉ុបនាសប្តាហ៍នេះ គឺការអនុម័តលើកញ្ចប់ប្រាក់កម្ចីអនុគ្រោះចំនួន ៩០ ពាន់លានអឺរ៉ូ (ជាង ១០៤ ពាន់លានដុល្លារ) សម្រាប់អ៊ុយក្រែន។ ការខ្វែងគំនិតគ្នារវាងអ៊ុយក្រែន និងសមាជិកសហភាពអឺរ៉ុបចចំនួនពីរគឺហុងគ្រី និងស្លូវ៉ាគី ទាក់ទងនឹងបំពង់បង្ហូរប្រេងពីរុស្ស៊ី ដែលឆ្លងកាត់ទឹកដីអ៊ុយក្រែនទៅកាន់ប្រទេសទាំងនេះ បានបណ្តាលឱ្យហុងគ្រី រារាំងការអនុម័តលើកញ្ចប់ប្រាក់កម្ចីចំនួន ៩០ ពាន់លានអឺរ៉ូសម្រាប់អ៊ុយក្រែន ទោះបីជាមានសម្ពាធពីប្លុកនេះក៏ដោយ។

ភាពជាប់គាំងនេះបន្តធ្វើឱ្យសហភាពអឺរ៉ុបស្ថិតក្នុងស្ថានភាពលំបាកក្នុងការរក្សាឯកភាពផ្ទៃក្នុងលើការឧបត្ថម្ភអ៊ុយក្រែន។ មេដឹកនាំនៃគណៈកម្មការអឺរ៉ុប និងប្រទេសសមាជិកជាច្រើន បានរិះគន់យ៉ាងខ្លាំងចំពោះហុងគ្រី ដោយអះអាងថា ការខ្វែងគំនិតគ្នាផ្ទៃក្នុងកំពុងធ្វើឱ្យអន្តរាយដល់សមត្ថភាពធ្វើសកម្មភាពរួមរបស់ EU ក្នុងបរិបទដែលប្លុកនេះ ត្រូវការឆ្លើយតបឱ្យបានឆាប់រហ័ស ចំពោះស្ថានភាពសកល។ អធិការបតីអាល្លឺម៉ង់ លោក Friedrich Merz បានព្រមានថា៖ “យើងយល់ស្របថា មិនអាចទទួលយកនូវអ្វីដែលទើបតែកើតឡើងនៅក្នុងក្រុមប្រឹក្សាអឺរ៉ុបនោះទេ។ ប្រការនេះ នឹងបង្កផលវិបាកឆ្ងាយជាងព្រឹត្តិការណ៍នេះទៅទៀត។ យើងខ្ញុំត្រូវការពិភាក្សាអំពីប្រធានបទនេះ (កញ្ចប់ប្រាក់កម្ចី ៩០ ពាន់លានអឺរ៉ូសម្រាប់អ៊ុយក្រែន) ម្តងទៀត ជាមួយនឹងលក្ខខណ្ឌគន្លឹះទាក់ទងនឹងថវិកា និងបញ្ហាពាក់ព័ន្ធជាច្រើនទៀត”។

ការបែកបាក់ផ្ទៃក្នុងរបស់សហភាពអឺរ៉ុប ជុំវិញបញ្ហាអ៊ុយក្រែនមិនកំណត់នៅត្រឹមការប្រឆាំងជំទាស់របស់ហុងគ្រីលើកញ្ចប់ជំនួយថ្មីនោះទេ។ ជម្លោះនៅមជ្ឈិមបូព៌ា និងហានិភ័យនៃវិបត្តិថាមពលថ្មីក៏កំពុងធ្វើឲ្យ EU រង្គោះរង្គើផងដែរ។ នៅថ្ងៃទី ១៤ ខែមីនា នាយករដ្ឋមន្ត្រីបែលហ្ស៊ិក លោក Bart De Wever បានថ្លែងថា សហភាពអឺរ៉ុប (EU) កំពុង «ចាញ់លើគ្រប់វិស័យ» ហើយត្រូវតែបញ្ឈប់ជម្លោះជាមួយរុស្ស៊ី «ដើម្បីផលប្រយោជន៍របស់អឺរ៉ុប»។ យោងតាមលោក Bart De Wever សហភាពអឺរ៉ុបត្រូវការស្ថាបនាឡើងវិញផង និងធ្វើប្រក្រតីភាពទំនាក់ទំនងជាមួយរុស្ស៊ីផង ដើម្បីទទួលបានថាមពលតម្លៃថោកឡើងវិញ។ លោកក៏បានចាត់ទុកថា មេដឹកនាំអឺរ៉ុបទាំងអស់សុទ្ធតែយល់ព្រមនឹងទស្សនៈនេះ ប៉ុន្តែ «គ្មាននរណាម្នាក់ហ៊ាននិយាយចេញមកឡើយ»៕