ດ້ວຍເລື່ອງບັນດາສະມາຊິກຊາວໜຸ່ມ ແລະ ນັກຮຽນປະກອບເງິນ 1.000 ດົ່ງໃນແຕ່ລະປີເພື່ອສ້າງກອງທຶນກໍ່ສ້າງເຮືອນແຫ່ງສາຍຈິດມິດໃຈ, ໃນໄລຍະເກືອບ 8 ປີຜ່ານມາ, ມີນັບສີບຄອບຄົວນັກຮຽນທຸກຍາກຢູ່ເມືອງ ກຣົວ ປັ໊ກ, ແຂວງ ດັ໊ກລັ໊ກ, ໄດ້ຮັບການໜູນຊ່ວຍກໍ່ສ້າງເຮືອນຢູ່ຖາວອນ, ສວຍງາມກວ່າ. ບັນດາເຮືອນທີ່ໄດ້ ກໍ່ສ້າງຈາກແຫຼ່ງທຶນ 1.000 ດົ່ງນັ້ນ ໄດ້ຊ່ວຍໃຫ້ພວກນ້ອງ ແລະ ຄອບຄົວມີຄວາມໄວ້ເນື້ອເຊື່ອໃຈ, ມີມານະຈິດເພື່ອບືນຕົວຂຶ້ນໃນການຮ່ຳຮຽນ ແລະ ການດຳລົງຊີວິດ.

ໃນທາມກາງແສງແດດຮ້ອນເອົ້າຂອງຕອນທ່ຽງ, ອ້າຍ ອີດຸ໊ດ ເອບານ, ຢູ່ບ້ານ ກຟລາງ, ແຂວງ ດັ໊ກລັ໊ກ ຍັງເມົາມົວກັບການເທພື້ນເຮືອນ. ອ້າຍ ອີດຸ໊ດ ໃຫ້ຮູ້ວ່າ, ອ້າຍໄດ້ຍາດເວລາເຮັດໃຫ້ສຳເລັດ ເພື່ອໃຫ້ນາຍຊ່າງເຮັດຂັ້ນຕອນຕໍ່ໄປ. ໃນຫຼາຍປີມານີ້, 2 ຜົວເມຍລ້ວນແຕ່ໄດ້ໄປເຮັດຮັບຈ້າງ, ດົນໆຈຶ່ງກັບເມືອບ້ານເທື່ອໜຶ່ງ, ລູກນ້ອຍ 3 ຄົນຕ້ອງຝາກນຳແມ່ຕູ້ເບິ່ງຊ່ວຍ. ເຮືອນຫຼັງເກົ່າຂອງ 2 ຜົວເມຍ ຄວາມຈິງນັ້ນແມ່ນຕູບນ້ອຍມີເນື້ອທີ່ປະມານ 10 ຕາແມັດ ເທົ່ານັ້ນ.
(ພິທີເລີ່ມລົງມືກໍ່ສ້າງເຮືອນແຫ່ງສາຍຈິດມິດໃຈໃຫ້ຄອບຄົວອ້າຍ ອີດຸ໊ດ ເອບານ)

ຕົ້ນປີນີ້, ລູກຊາຍຂອງອ້າຍ ອີດຸ໊ດ ແມ່ນ ອີຢຸຍນີເອ (ນັກຮຽນຫ້ອງປໍ 4, ໂຮງຮຽນປະຖົມ ໂງຢາຕື້) ໄດ້ຮັບການໜູນຊ່ວຍຈຳນວນເງິນ 25 ລ້ານດົ່ງ ຈາກຄະນະຊາວໜຸ່ມເມືອງ ແລະ ບັນດາຫົວໜ່ວຍໄດ້ອຸປະຖຳເປັນຈຳນວນເງິນ 40 ລ້ານດົ່ງ ຕື່ມອີກເພື່ອກໍ່ສ້າງເຮືອນແຫ່ງສາຍຈິດມິດໃຈ. ເຮືອນຫຼັງນີ້ຫາກໍ່ເລີ່ມກໍ່ສ້າງໃນຕົ້ນເດືອນ ມີນາ, ທັງຄອບຄົວຂອງອ້າຍ ອີດຸ໊ດ ລ້ວນແຕ່ມີຄວາມເບີກບານມ່ວນຊື່ນ.

“ວຽກງານ ແລະ ສະພາບເສດຖະກິດຂອງຄອບຄົວໄດ້ປະສົບກັບຄວາມຫຍຸ້ງຍາກ, ພຽງແຕ່ອີງໃສ່ການໄປເຮັດຮັບຈ້າງໃຫ້ພໍກິນເທົ່ານັ້ນ, ສະນັ້ນເຮືອນຢູ່ກໍ່ເຮັດແບບເຮືອນຕູບ ຊົ່ວຄາວເທົ່ານັ້ນ, ຍ້ອນຫາບໍ່ໄດ້ແຫຼ່ງເງິນກູ້ຢືມເພື່ອກໍ່ສ້າງເປັນເຮືອນຖາວອນ. ແຕ່ ປະຈຸບັນໄດ້ຮັບແຫຼ່ງເງິນໜູນຊ່ວຍກໍ່ສ້າງເຮືອນຫຼັງໜຶ່ງ, ຂ້າພະເຈົ້າຮູ້ສຶກມີປິຕິຊົມຊື່ນທີ່ສຸດ. ມີເຮືອນຫຼັງໃໝ່ແລ້ວ, ທັງຄອບຄົວກໍ່ມານະພະຍາຍາມເຮັດວຽກເພື່ອພັດທະນາເສດຖະກິດ ແລະ ຊື້ເຄື່ອງໃຊ້ໃນຄອບຄົວຕື່ມອີກ”.

(ປ້າ ມາຍທິເຟືອງ, ເປັນ 1 ໃນຈຳນວນ 2 ຄອບຄົວໄດ້ຮັບການໜູນຊ່ວຍກໍ່ສ້າງເຮືອນ)

ກ່ອນໜ້ານັ້ນ, ກໍ່ຢູ່ຕາແສງ ເຕີນຕ໊ຽນ, ເມືອງ ກຣົງ ປັ໊ກ, ມີເຮືອນແຫ່ງສາຍຈິດມິດໃຈ 2 ຫຼັງກໍ່ໄດ້ຮັບການກໍ່ສ້າງ. ປ້າ ມາຍທິເຟືອງ, ເປັນ 1 ໃນຈຳນວນ 2 ຄອບຄົວໄດ້ຮັບການໜູນຊ່ວຍກໍ່ສ້າງເຮືອນ ເລົ່າສູ່ຟັງວ່າ: ເມື່ອໄດ້ຮັບເງິນໜູນຊ່ວຍ 25 ລ້ານດົ່ງເພື່ອກໍ່ສ້າງເຮືອນ, ສອງຜົວເມຍປ້າໄດ້ໄປກູ້ຢືມເງິນຕື່ມອີກເພື່ອປຸກສ້າງເຮືອນໃຫ້ກວ້າງໃຫຍ່ກວ່າ. ຍ້ອນໄດ້ຮັບການຊ່ວຍເຫຼືອຈາກບັນດາສະມາຊິກຊາວໜຸ່ມ ແລະ ຍາດຕິພີ່ນ້ອງ ສະນັ້ນພາຍຫຼັງ 1 ເດືອນ ເຮືອນຂອງປ້າກໍ່ໄດ້ຮັບການກໍ່ສ້າງສຳເລັດ. ປ້າ ມາຍທິເຟືອງ, ແບ່ງປັນວ່າ.

“ຈຳນວນເງິນທີ່ກູ້ຢຶມໄດ້ນັ້ນ ເມື່ອທຽບໃສ່ຄົນອື່ນແມ່ນບໍ່ຫຼາຍ, ແຕ່ສຳລັບຂ້າພະເຈົ້າແມ່ນຫຼາຍແລ້ວ. ນັບແຕ່ເມື່ອເຮືອນໄດ້ຮັບການກໍ່ສ້າງສຳເລັດແລ້ວ ຂ້າພະເຈົ້າມີຄວາມປິຕິຊົມຊື່ນຫຼາຍ, ປະຈຸບັນຊີວິດຂອງຄອບຄົວ ກໍປົກກະຕິແລ້ວ, ໜີ້ກໍ່ຄ່ອຍໆຊຳລະໄດ້ໝົດ.”

ບັນດາເຮືອນແຫ່ງສາຍຈິດມິດໃຈດັ່ງກ່າວໄດ້ຮັບການກໍ່ສ້າງຈາກລາຍການ “ເຮືອນແຫ່ງສາຍຈິດມິດໃຈ-ເຮືອນ 1.000 ດົ່ງ” ໂດຍຄະນະຊາວໜຸ່ມເມືອງ ກຣົງ ປັ໊ກ ຜັນຂະຫຍາຍນັບແຕ່ປີ 2013. ຕາມນັ້ນແລ້ວ, ແຕ່ລະປີຄະນະຊາວໜຸ່ມເມືອງໄດ້ຂົນຂວາຍການແຜ່ບໍລິຈາກໃນໝູ່ຊາວໜຸ່ມ,ເຍົາວະຊົນ ອະນຸຊົນ, ຄົນລະ 2.000 ດົ່ງ ເພື່ອກໍ່ສ້າງເຮືອນ 2 ຫຼັງໃຫ້ແກ່ຄອບຄົວເປົ້າໝາຍນະໂຍບາຍ, ເປົ້າໝາຍທີ່ປະສົບກັບຄວາມຫຍຸ້ງຍາກເປັນພິເສດດ້ານເຮືອນຢູ່. ອ້າຍ ຫວໍກວ໊ກຫວຽດ, ເລຂາຄະນະພັກຕາແສງ ເຕີນຕ໊ຽນ, ເມືອງ ກຣົງ ປັ໊ກ, ໃຫ້ຮູ້ວ່າ.

“ໂດຍປະຕິບັດຕາມຄຳແນະນຳຂອງຄະນະຊາວໜຸ່ມເມືອງ, ແຕ່ລະປີລ້ວນແຕ່ມີລາຍການກໍ່ສ້າງເຮືອນແຫ່ງສາຍຈິດມິດໃຈ 1.000 ດົ່ງ, ພວກຂ້າພະເຈົ້າໄດ້ຜັນຂະຫຍາຍເຖິງໜ່ວຍຊາວໜຸ່ມຢູ່ບັນດາບ້ານ ແລະ ສຳຫຼວດທຸກບ້ານ ແລະ ຄະນະຊາວໜຸ່ມຕາແສງກໍ່ໄດ້ໜູນຊ່ວຍໃນວິວັດການຜັນຂະຫຍາຍການກໍ່ສ້າງ. ທັງລະບົບການເມືອງໄດ້ເຂົ້າຮ່ວມເພື່ອແນໃສ່ຫຼຸດຜ່ອນອັດຕາຄອບຄົວທຸກຍາກ ແລະ ບັນດາຄອບຄົວທຸກຍາກເປັນພິເສດດ້ານເຮືອນຢູ່ ຕ້ອງໄດ້ຮັບການແກ້ໄຂໄວເພື່ອໃຫ້ເຂົາເຈົ້າໝັ້ນໃຈພັດທະນາເສດຖະກິດ”.

ມາຮອດປະຈຸບັນ, ລາຍການເຮືອນ 1.000 ດົ່ງຢູ່ເມືອງ ກຣົງ ປັ໊ກ ໄດ້ໜູນຊ່ວຍກໍ່ສ້າງເຮືອນ 12 ຫຼັງໃຫ້ແກ່ຄອບຄົວນັກຮຽນປະສົບກັບຄວາມຫຍຸ້ງຍາກ. ອ້າຍ ຫງວຽນວັນຮ່າ, ເລຂາຄະນະຊາວໜຸ່ມເມືອງ ກຣົງ ປັ໊ກ ໃຫ້ຮູ້ວ່າ, ລາຍການໄດ້ນຳມາເຊິ່ງປະສິດທິຜົນຢ່າງແທດຈິງ, ບໍ່ພຽງແຕ່ຊ່ວຍໃຫ້ບັນດາຄອບຄົວມີເຮືອນຢູ່ຖາວອນ ເພື່ອຈາກນັ້ນຮັບປະກັນຊີວິດການເປັນຢູ່, ບືນຕົວຂຶ້ນເທື່ອລະກ້າວເພື່ອລົບລ້າງຄວາມອຶດຫິວ ຫຼຸດຜ່ອນຄວາມທຸກຍາກເທົ່ານັ້ນ, ຫາກຍັງປຸກລູກຈິດໃຈອູ້ມຊູຊ່ວຍເຫຼືອເຊິ່ງກັນແລະກັນໃນໝູ່ຊາວໜຸ່ມ, ໄວໜຸ່ມ ແລະ ນັກສຶກສາອີກດ້ວຍ.

“ປະສິດທິຜົນບໍ່ພຽງແຕ່ຢຸດຢູ່ໃນການກໍ່ສ້າງເຮືອນຫຼັງໜຶ່ງເທົ່ານັ້ນ, ຫາກຍັງແມ່ນການແບ່ງປັນ, ສຶກສາຊາວໜຸ່ມເຍົາວະຊົນອະນຸຊົນມີການປະຢັດ, ຄວາມຮັກແພງ, ແບ່ງປັນກັບປະຊາຄົມອີກດ້ວຍ. ສະພາບຕົວຈິງສະແດງໃຫ້ເຫັນວ່າ, ມີຫຼາຍຄອບຄົວ, ພິເສດແມ່ນບັນດາຊາວໜຸ່ມເຍົາວະຊົນອະນຸຊົນແມ່ນຜູ້ໄດ້ຮັບຜົນປະໂຫຍດຈາກລາຍການ ຊຶ່ງໄດ້ມີມານະຈິດ, ມານະພະຍາຍາມ ບືນຕົວຂຶ້ນໃນການຮ່ຳຮຽນ ແລະ ເສດຖະກິດຄອບຄົວກໍ່ເລີ່ມດີຂຶ້ນ ແລະ ຕັ້ງໜ້າເຂົ້າຮ່ວມບັນດາການເຄື່ອນໄຫວຂອງທ້ອງຖິ່ນ. ວຽກງານທ່ີມີຄວາມໝາຍນີ້ກໍ່ໄດ້ຮັບການຮ່ວມແຮງຮ່ວມໃຈ ໜູນຊ່ວຍຈາກປະຊາຄົມ”.

ປະກອບເງິນພຽງ 1.000 ດົ່ງ/ປີ, ເຖິງວ່າຈຳນວນເງິນເລກໜ້ອຍກໍ່ຕາມ, ແຕ່ດ້ວຍການຮ່ວມແຮງຮ່ວມໃຈ, ປະກອບກຳຮັງເຫື່ອແຮງຂອງກຳລັງຊາວໜຸ່ມ ແລະ ນັກສຶກສາ, ນັບມື້ນັບມີເຮືອນແຫ່ງສາຍຈິດມິດໃຈໃໝ່ຫຼາຍຫຼັງໄດ້ຮັບການກໍ່ສ້າງ. ວິທີເຮັດຂອງຄະນະຊາວໜຸ່ມເມືອງ ກຣົງ ປັ໊ກ ໄດ້ປະກອບສ່ວນແຜ່ຂະຫຍາຍຈິດໃຈແບ່ງປັນ, ຄວາມສາມັກຄີໃນໝູ່ໄວໜຸ່ມ, ສຶກສາພວກນ້ອງກ່ຽວກັບມູນເຊື້ອອັນດີງາມ “ອູ້ມຊູຊ່ວຍເຫຼືອເຊິ່ງກັນແລະກັນ” ຂອງຊາດຫວຽດນາມ.