ສ້າງໂຄງປະກອບຂະແຫນງຕຳ່ແຜ່ນຕັດຫຍິບຄືນໃຫມ່ເພື່ອເໝາະສົມກັບການເຊື່ອມໂຍງເຂົ້າກັບເສດຖະກິດສາກົນ

(vovworld)-ພັດທະນາຂະແຫນງຕຳ່ແຜ່ນຕັດຫຍິບຕິດພັນກັບວິວັດການເຊື່ອມໂຍງເຂົ້າກັບເສດຖະກິດສາກົນ, ຮັບເອົາບົດຮຽນໃໝ່ຈາກບັນດາປະເທດພັດທະນາໃນຂົງເຂດຕຳ່ແຜ່ນຕັດຫຍິບ ເພື່ອຈຸດໝາຍສ້າງຂະແຫນງຕຳ່ແຜ່ນຕັດຫຍິບ ຫວຽດນາມ ໃຫ້ກາຍເປັນຫນຶ່ງໃນບັນດາຂະແຫນງອຸດສາຫະກຳຈຸດສຸມ, ປາຍແຫລມກ່ຽວກັບການສົ່ງອອກ. ສິ່ງດັ່ງກ່າວໄດ້ຮັບການເຕື້ອງເຖິງໃນແຜນຮ່າງ “ວາງແຜນພັດທະນາຂະແຫນງອຸດສາຫະກຳຕຳ່ແຜ່ນຕັດຫຍິບຫວຽດນາມ ຮອດປີ 2020 ວິໄສທັດ 2030” ໂດຍກະຊວງອຸດສາຫະກຳການຄ້າ ຫວຽດນາມ ຮຽບຮຽງ.

ຕຳ່ແຜ່ນຕັດຫຍີບພວມແມ່ນຂົງເຂດມີທີ່ຕັ້ງສຳຄັນໃນພື້ນຖານເສດຖະກິດຫວຽດນາມ. ປະຈຸບັນ ທົ່ວປະເທດມີວິສາຫະກິດຕຳ່ແຜ່ນຕັດຫຍິບ 5.982 ແຫ່ງ, ປະກອບ 8% GDP, ສ້າງວຽກເຮັດງານທຳໃຫ້ຜູ້ອອກແຮງງານ 2 ລ້ານຄົນ ແລະ ແມ່ນຫນຶ່ງໃນບັນດາຂະແຫນງນຳຫນ້າໃນການສົ່ງອອກ. ປີ 2012, ການສົ່ງອອກເຄື່ອງຕຳແຜ່ນຕັດຫຍິບບັນລຸກວ່າ 17 ຕື້ USD, ປະກອບເກືອບ 15% ໃຫ້ແກ່ຍອດວົງເງິນສົ່ງອອກຂອງທົ່ວປະເທດ. ປະຈຸບັນ ຫວຽດນາມ ແມ່ນຫນຶ່ງໃນຈຳນວນ 5 ປະເທດສົ່ງອອກເຄື່ອງຕຳ່ແຜ່ນຕັດຫຍິບຫລາຍກວ່າໝູ່ຢູ່ໃນໂລກ. ການພັດທະນາຂອງຂະແຫນງຕຳ່ແຜ່ນຕັດຫຍິບໄລຍະຜ່ານມາໄດ້ປະກອບສ່ວນແກ້ໄຂບັນຫາຮັບປະກັນຊີວິດສັງຄົມ, ຫັນປ່ຽນອົງປະກອບເສດຖະກິດ ແລະ ແຮງງານ. ເຖິງຢ່າງໃດກໍຕາມ, ຂະແຫນງຕຳ່ແຜ່ນຕັດຫຍິບຍັງມີຫລາຍບັນຫາທີ່ຍັງຄົງຄ້າງຢູ່ຄື: ເຕັກໂນໂລຢີຫນູນຊ່ວຍຂະແຫນງຕຳ່ແຜ່ນຕັດຫຍິບຍັງຫລ້າຫລັງ, ແພໄຫມ ແລະ ເຄື່ອງຮັບໃຊ້ຂະແຫນງຕັດຫຍິບສ່ວນຫລາຍແມ່ນນຳເຂົ້າຈາກຕ່າງປະເທດ. ມີວິສາຫະກິດຫລາຍແຫ່ງພຽງແຕ່ຜະລິດຕາມຮູບແບບຮັບຈ້າງເທົ່ານັ້ນ, ສະນັ້ນມູນຄ່າເພີ່ມຍັງຢູ່ໃນລະດັບຕຳ່. ໃນຂະນະນັ້ນ, ວຽກງານເກັບກຳ, ໄຈ້ແຍກ, ສະຫນອງຂໍ້ມູນຂ່າວສານກ່ຽວກັບຕະຫລາດຍັງຊັກຊ້າ; ຄວາມຊຳນານງານໃນການອອກແບບ, ພັດທະນາຜະລິດຕະພັນຍັງຈຳກັດຢູ່. ການຫັນປ່ຽນຢ່າງວ່ອງໄວຂອງຂະແຫນງຕຳ່ແຜ່ນຕັດຫຍິບຢູ່ໃນໂລກໄດ້ ແລະ ພວມເຮັດໃຫ້ຂະແຫນງຕຳ່ແຜ່ນຕັດຫຍິບຫວຽດນາມ ຕ້ອງມີການດັດປັບໃຫ້ເໝາະສົມ, ຕອບສະຫນອງຄວາມຮຽກຮ້ອງຕ້ອງການຂອງການເຊື່ອມໂຍງ. ທ່ານນາງ ໂຮ່ທິກີມທວາ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ຫວຽດນາມ ໃຫ້ຮູ້ວ່າ:

“ປະຈຸບັນ ເສດຖະກິດ ຫວຽດນາມ ນັບມື້ນັບເຊື່ອມໂຍງຢ່າງເລິກເຊິ່ງ ແລະ ກວ້າງຂວາງເຂົ້າພື້ນຖານເສດຖະກິດໂລກ ແລະ ຫວຽດນາມ ໄດ້ລົງນາມໃນຂໍ້ຕົກລົງສອງຝ່າຍແລະ ຫລາຍຝ່າຍກັບ 80 ກວ່າປະເທດ ຫລາຍສະບັບ. ໃນສະພາບຄືແນວນັ້ນ ຂະແຫນງຕຳ່ແຜ່ນຕັດຫຍິບ ຄວນມີການປ່ຽນແປງເພື່ອຕອບສະຫນອງຄວາມຕ້ອງການຂອງສະພາບຕົວຈິງ.”

ພາບປະກອບ:internet

ດ້ວຍເຫດນັ້ນ ຫວ່າງແລ້ວນີ້ ກະຊວງອຸດສາຫະກຳ ແລະ ການຄ້າ ຫວຽດນາມ ໄດ້ຈັດຕັ້ງກອງປະຊຸມສຳມະນາ ປະກອບຄຳເຫັນໃສ່ແຜນຮ່າງ “ສ້າງແຜນພັດທະນາຂະແຫນງອຸດສາຫະກຳຕຳ່ແຜ່ນຕັດຫຍິບຫວຽດນາມຮອດປີ 2020, ວິໄສທັດ ປີ 2030”, ໃນນັ້ນ ສຸມໃສ່ດັດປັບແຜນພັດທະນາຂະແຫນງຕຳ່ແຜ່ນຕັດຫຍິບຮອດປີ 2015, ກຳນົດທິດຮອດປີ 2020 ໃຫ້ເໝາະສົມກັບສະພາບຕົວຈິງ, ຕອບສະຫນອງຄວາມຮຽກຮ້ອງຕ້ອງການເຊື່ອມໂຍງເຂົ້າກັບສາກົນ. ບັນຫາວາງອອກນັ້ນແມ່ນ ຂະແຫນງຕຳ່ແຜ່ນຕັດຫຍິບຫວຽດນາມ ຄວນເພີ່ມອັດຕາຊົມໃຊ້ຜະລິດຕະພັນພາຍໃນ, ຈຳກັດທ່າອ່ຽງຜະລິດຕາມຮູບແບບຮັບຈ້າງ, ພັດທະນາລະບົບສະຫນອງເຄື່ອງຕຳ່ແຜ່ນຕັດຫຍິບໃນທົ່ວຂະແຫນງຢ່າງຄົບຊຸດ, ນັບແຕ່ການຜະລິດວັດຖຸດິບ, ການກໍ່ສ້າງບັນດາໂຮງງານຜະລິດຝ້າຍ, ຕະຫຼອດຮອດການຕຳ່ແຜ່ນຕັດຫຍິບ, ເຮັດໄດ້ຄືແນວນັ້ນ ຈຶ່ງສາມາດເພີ່ມມູນຄ່າເພີ່ມຂຶ້ນຕື່ມ ແລະ ບັນລຸປະສິດທິຜົນ. ຄຽງຄູ່ກັນນັ້ນ ການຕອບສະໜອງຄວາມຕ້ອງການນັບແຕ່ສົ້ນເຂົ້າຕະຫລອດຮອດສົ້ນອອກຈະຊ່ວຍໃຫ້ຫວຽດນາມ ຕອບສະຫນອງໄດ້ຄວາມຮຽກຮ້ອງກ່ຽວກັບແຫ່ງຜະລິດເຄື່ອງຕຳ່ແຜ່ນຕັດຫຍິບໃນບັນດາສັນຍາການຄ້າເສລີ. ທ່ານ ເລຕຽນເຈື່ອງ ຮອງຜູ້ອຳນວຍການໃຫຍ່ປະຈຳກຸ່ມບໍລິສັດ ຕຳ່ແຜ່ນຕັດຫຍິບຫວຽດນາມ (Vinatex) ໃຫ້ຮູ້ວ່າ:

“ວິວັດທະນາການກະກຽມຂອງຂະແຫນງຕຳ່ແຜ່ນຕັດຫຍິບຫວຽດນາມ ໃນຫລາຍປີຜ່ານມາ ດ້ວຍທ່າອ່ຽງເຊື່ອມໂຍງເຂົ້າກັບສາກົນນັ້ນ ແມ່ນຖືກຕ້ອງຊັດເຈນ. ພວກເຮົາສຸມໃສ່ປັບປຸງມູນຄ່າເພີ່ມພາຍໃນປະເທດ, ເພີ່ມລັກສະນະເປັນເຈົ້າການໃນທຸກຂອດ, ພິເສດ ຂອດອອກແບບ ແລະ ວັດຖຸດິບ. ວິວັດການນີ້ໄດ້ດຳເນີນໃນສີບໆປີຜ່ານມາ ນັບແຕ່ເມື່ອລັດຖະບານກະກຽມເຈລະຈາສັນຍາການຄ້າສອງຝ່າຍ BTA ກັບອາເມລິກາ, ເຂົ້າເປັນສະມາຊິກອົງການການຄ້າໂລກ ແລະ ປະຈຸບັນ ພວມກະກຽມເຂົ້າຮ່ວມສົນທິສັນຍາຄູ່ຮ່ວມມືເຂດປາຊີຟີກ (TPP). ການກະກຽມໃນຫລາຍປີຜ່ານມາໄດ້ຊ່ວຍຂະແຫນງ ຕຳ່ແຜ່ນຕັດຫຍິບຫວຽດນາມ ປັບປຸງມູນຄ່າເພີ່ມ ຈາກ 25-30% ອັດຕານຳໃຊ້ວັດຖຸພາຍໃນ. ມາເຖິງປະຈຸບັນ, ອັດຕານຳໃຊ້ວັດຖຸພາຍໃນປະເທດບັນລຸເກືອບ 50%.”

ຈຸດໝາຍພັດທະນາຂອງຂະແຫນງຕຳ່ແຜ່ນຕັດຫຍິບຫວຽດນາມ ໃນໄລຍະຈະມາເຖິງແມ່ນສ້າງຂະແຫນງຕຳ່ແຜ່ນຕັດຫຍິບຫວຽດນາມ ໃຫ້ກາຍເປັນຂະແຫນງອຸດສາຫະກຳຈຸດສຸມກ່ຽວກັບການສົ່ງອອກ, ຕອບສະຫນອງຄວາມຕ້ອງການການໃຊ້ສອຍພາຍໃນປະເທດ, ສ້າງວຽກເຮັດງານທຳໃຫ້ແກ່ຄົນງານເປັນຈຳນວນຫລາຍ, ຍົກສູງຄວາມສາມາດແກ້ງແຍ້ງ ແລະ ເຊື່ອມໂຍງເຂົ້າກັບພື້ນຖານເສດຖະກິດພາກພື້ນ ແລະ ໂລກຢ່າງໝັ້ນຄົງ, ສູ້ຊົນຮອດປີ 2020 ຈະສ້າງເຄື່ອງໝາຍການຄ້າທີ່ມີຊື່ສຽງ. ຕາມແຜນຮ່າງແລ້ວ, ຂະແຫນງຕຳ່ແຜ່ນຕັດຫຍິບຫວຽດນາມ ຈະສູ້ຊົນເພື່ອບັນລຸວົງເງິນສົ່ງອອກຈາກ 31 - 32 ຕື້ USD ໃນປີ 2020 ແລະ ເພີ່ມຂຶ້ນ 60 - 65 ຕື້ USD ໃນປີ 2030. ດ້ວຍທ່າແຮງກ່ຽວກັບແຫຼ່ງຊັບພະຍາກອນມະນຸດ, ທີ່ມີສີມືດີ, ສິນຄ້າມີຫລາຍຮູບຫລາຍແບບ, ຂະແຫນງ ຕຳ່ແຜ່ນຕັດຫຍິບຫວຽດນາມ ນັບມື້ນັບຢືນຢັນທີ່ຕັ້ງຂອງຕົນໃນຕະຫລາດໂລກ. ເຖິງຢ່າງໃດກໍຕາມ ຕໍ່ຫນ້າທ່າອ່ຽງໃຫມ່, ຂະແຫນງ ຕຳ່ແຜ່ນຕັດຫຍິບຫວຽດນາມ ຄວນເພີ່ມທະວີການຮ່ວມມື, ຖອດຖອນບົດຮຽນຈາກປະເທດຕ່າງໆ, ກຳແຫນ້ນກາລະໂອກາດໃຫມ່, ພັດທະນາຢ່າງຄົບຊຸດ ຈາກນັ້ນສ້າງການຫັນປ່ຽນເພື່ອພັດທະນາຢ່າງວອ່ງໄວ ແລະ ໝັ້ນຄົງ.

Tag: ຕັດຫຍິບ