ຍົກສູງມູນຄ່າຜະລິດຕະພັນປາທູນາມະຫາສະມຸດຂອງ ຫວຽດນາມ

ຫວຽດນາມ ແມ່ນປະເທດສົ່ງອອກປາທູນາມະຫາສະມຸດຫລາຍອັນດັບ 3 ໃນໂລກ ແຕ່ປະຈຸບັນ, ມູນຄ່າການສົ່ງອອກຜະລິດຕະພັນປາທູນາມະຫາສະມຸດ ຫວຽດນາມ ບໍ່ທັນສູງ ແລະ ຍາມໃດກໍ່ປະສົບກັບຄວາມຫຍຸ້ງຍາກຢູ່ຕະຫລາດໂລກ

(vovworld) - ຫວຽດນາມ ແມ່ນປະເທດສົ່ງອອກປາທູນາມະຫາສະມຸດຫລາຍອັນດັບ 3 ໃນໂລກ ແຕ່ປະຈຸບັນ, ມູນຄ່າການສົ່ງອອກຜະລິດຕະພັນປາທູນາມະຫາສະມຸດ ຫວຽດນາມ ບໍ່ທັນສູງ ແລະ ຍາມໃດກໍ່ປະສົບກັບຄວາມຫຍຸ້ງຍາກຢູ່ຕະຫລາດໂລກ. ສາຍເຫດຕົ້ນຕໍຍ້ອນການເຄື່ອນໄຫວຂຸດຄົ້ນປາທູນາມະຫາສະມຸດຍັງຄົງມີລັກສະນະທຳມະຊາດ, ບໍ່ທັນໄດ້ຮັບການຄຸ້ມຄອງຕາມມາດຖານສາກົນ. ປີ 2010, ຄະນະກຳມະການອາຊີບຫາປາພາກຕາເວັນຕົກ ແລະ ພາກກາງເຂດປາຊີຟິກ ໄດ້ຜັນຂະຫຍາຍໂຄງການ “ຫນູນຊ່ວຍຄຸ້ມຄອງອາຊີບຫາປາທູນາມະຫາສະມຸດ ຫວຽດນາມ”, ປະກອບສ່ວນສ້າງພື້ນຖານເພື່ອໃຫ້ຫວຽດນາມ ກາຍເປັນສະມາຊິກຂອງຄະນະກຳມະການ ອາຊີບຫາປາພາກຕາເວັນຕົກ ແລະ ພາກກາງປາຊີຟິກຢ່າງເປັນທາງການ ໂດຍໄວ.

ຢູ່ເຂດທະເລ ຫວຽດນາມ ມີປາທູນາ 9 ຊະນິດ
ພາບ: thanhnien.com.vn

ຢູ່ເຂດທະເລ ຫວຽດນາມ ມີປາທູນາ 9 ຊະນິດ, ອາໄສຕົ້ນຕໍຢູ່ເຂດທະເລໄກຝັ່ງທາງພາກກາງ ແລະ ທິດຕາເວັນອອກພາກໃຕ້. ຕາມສະຫະສະມາຄົມປາທູນາ ຫວຽດນາມ ແລ້ວ, ປະລິມານປາທູນາມະຫາສະມຸດຢູ່ເຂດທະເລ ຫວຽດນາມ ປະມານ 50.000 ໂຕນ, ຄວາມສາມາດຂຸດຄົ້ນແບບຍືນຍົງປະມານ 17.000 ໂຕນ/ປີ. ກະຊວງອຸດສາຫະກຳ ແລະ ການຄ້າຫວຽດນາມ ໄດ້ກຳນົດວ່າ ປາທູນາມະຫາສະມຸດແມ່ນຫນຶ່ງໃນ 3 ປະເພດສິນໃນນ້ຳສົ່ງອອກຕົ້ນຕໍຂອງ ຫວຽດນາມ (ພ້ອມກັບປາຫນັງ ແລະ ກຸ້ງ). ຕາມການສະຖິຕິຂອງກົມໃຫຍ່ສິນໃນນ້ຳ ຫວຽດນາມແລ້ວ, ປະຈຸບັນ ຫວຽດນາມ ມີ 2500 ພາຫະນະປະກອບອາຊີບຫາ ປາທູນາມະຫາສະມຸດ ແລະ ສຸມໃສ່ຢູ່ບັນດາແຂວງທາງທິດໃຕ້ພາກກາງ ຫວຽດນາມ, ຊື່ງລວມມີ: ແຂວງບີ່ງດີ້ງ, ຟູອຽນ ແລະ ແຄງຮ່ວາ, ດ້ວຍປະລິມານຂຸດຄົ້ນປະຈຳປີເກືອບ 10.000 ໂຕນ. ແຂວງ ຟູອຽນ ໄດ້ຮັບຖືວ່າ ແມ່ນແຫ່ງທີ່ມີອາຊີບຫາປາທູນາມະຫາສະມຸດພັດທະນາກວ່າໝູ່. ສະເພາະໃນປີ 2012, ຊາວປະມົງ ຟູອຽນ ໄດ້ຕໍ່ກຳປັ່ນໃຫມ່, ຫັນກຳປັ່ນນັບຮ້ອຍລຳເປັນພາຫະນະປະກອບອາຊີບຫາປາທູນາມະຫາສະມຸດ. ຊາວປະມົງ ຫງວຽນເດົາ ຢູ່ ຕາແສງ 6 ນະຄອນ ຕຸຍຮ່ວາ ແຂວງ ຟູອຽນ ໃຫ້ຮູ້ວ່າ:

“ກ່ອນນີ້ ມີພຽງແຕ່ຊາວປະມົງຢູ່ແຂວງ ຟູອຽນ ຫລື ບີ່ງດີ້ງ ຫາປາທູນາມະຫາສະມຸດເທົ່ານັ້ນ. ປະຈຸບັນ ໄດ້ຂະຫຍາຍໄປທົ່ວປະເທດແລ້ວ, ຈາກພາກເໜືອຕະຫລອດຮອດພາກໃຕ້. ເພາະວ່າ ອາຊີບຫາປາກໍງ່າຍດາຍ ສະນັ້ນຈຶ່ງມີຫລາຍຄົນເຮັດອາຊີບນີ້.”

ປະຈຸບັນ, ມີ 90% ຜະລິດຕະພັນປາທູນາມະຫາສະມຸດ ຢູ່ ຫວຽດນາມ ສະຫງວນໃຫ້ແກ່ການສົ່ງອອກ. ປີ 2011, ມູນຄ່າການສົ່ງອອກປາທູນາມະຫາສະມຸດ ຫວຽດນາມ ບັນລຸເກືອບ 400 ລ້ານ USD. ໃນ 9 ເດືອນຕົ້ນປີ 2012, ມູນຄ່າການສົ່ງອອກປາທູນາບັນລຸເກືອບ 430 ລ້ານ USD. ປະຈຸບັນ ປາທູນາ ຫວຽດນາມ ຖືກສົ່ງໄປຂາຍຢູ່ 92 ຕະຫລາດສາກົນ. ຄາດວ່າ ໃນປີນີ້, ການສົ່ງອອກປາທູນາມະຫາສະມຸດ ສາມາດເພີ່ມຂຶ້ນສູງໄດ້ ໃນຂະນະທີ່ມູນຄ່າການສົ່ງອອກປະເພດສິນໃນນ້ຳຈຳນວນຫນຶ່ງຖືກຫລຸດລົງເມື່ອທຽບກັບຊຸມປີກ່ອນ. ສິ່ງເປັນຫນ້າສົນໃຈ ນັ້ນແມ່ນ ອາຊີບຂຸດຄົ້ນປຸງແຕ່ງປາທູນາມະຫາສະມຸດ ກວມອັດຕາສ່ວນຫຼາຍ ແລະ ພວມພັດທະນາຢ່າງແຮງ ແຕ່ມາຮອດປະຈຸບັນ ຫວຽດນາມ ບໍ່ທັນມີເອກະສານນິຕິກຳສະບັບໃດກຳນົດສະເພາະກ່ຽວກັບປາທູນາ. ອາຊີບຫາປາທູນາມະຫາສະມຸດ ພັດທະນາແບບທຳມະຊາດ, ການຮັກສາ, ປຸງແຕ່ງ, ສຳພັດກັບຕະຫຼາດຍັງຈຳກັດຢູ່. ສະນັ້ນ ຕ້ອງມີກົນໄກນະໂຍບາຍ ແລະ ມາດຕະການ ເພື່ອສ້າງເງື່ອນໄຂສ່ົງອອກສິນຄ້າປະເພດນີ້ຢ່າງໝັ້ນຄົງ. ທ່ານ ຫວູດີ່ງດາບ, ປະທານສະຫະສະມາຄົມປາທູນາ ຫວຽດນາມ ໃຫ້ຮູ້ວ່າ:

“ຜະລິດຕະພັນຂອງຫວຽດນາມ ສົ່ງໄປຂາຍຢູ່ຕ່າງປະເທດ ຈະຖືກຮົ້ວກີດຂວາງດ້ານເຕັກນິກຈາກຕ່າງປະເທດ. ເພາະວ່າ ຫລາຍປະເທດໄດ້ຍົກອອກບັນດາມາດຕະຖານຄື: ປາທູນາຂຸດຄົ້ນຢູ່ແຫ່ງໃດ, ເງື່ອນໄຂຫລັກອະນາໄມດ້ານສະບຽງອາຫານ... ເມື່ອຫວຽດນາມ ບໍ່ທັນມີເງື່ອນໄຂຢ່າງຄົບຖ້ວນ, ບັນດາປະເທດຄູ່ຮ່ວມມືຈະກໍ່ຄວາມກົດດັນເພື່ອຫລຸດລາຄາລົງ.”

ປະຈຸບັນ, ມີ 90% ຜະລິດຕະພັນປາທູນາມະຫາສະມຸດ ຢູ່ ຫວຽດນາມ ສະຫງວນໃຫ້ແກ່ການສົ່ງອອກ
ພາບ:internet

ປີ 2010, ຄະນະກຳມະການອາຊີບຫາປາພາກຕາເວັນຕົກ ແລະ ພາກກາງ ເຂດປາຊີຟີກ ໄດ້ຫນູນຊ່ວຍ ຫວຽດນາມ ຜັນຂະຫຍາຍໂຄງການຄຸ້ມຄອງອາຊີບຫາປາ ມະຫາສະມຸດ, ໂດຍເລັ່ງໃສ່ປາທູນາ 2 ຊະນິດ ທີ່ພວມມີໄພຫຼຸດລົງ, ຍ້ອນຖືກຂຸດຄົ້ນຫລາຍເກີນໄປ. ຈຸດໝາຍຂອງໂຄງການແມ່ນສ້າງພື້ນຖານດ້ານວິທະຍາສາດໃນການຄຸ້ມຄອງອາຊີບຫາປາທູນາມະຫາສະມຸດ, ກ້າວໄປເຖິງເລື່ອງນຳຫວຽດນາມ ກາຍເປັນສະມາຊິກຂອງຄະນະກຳມະການອາຊີບຫາປາພາກຕາເວັນຕົກ ແລະ ພາກກາງເຂດປາຊີຟີກຢ່າງເປັນທາງການ. ຕາມທ່ານ ຟ້າມຈ້ອງອຽນ, ຮອງຫົວຫນ້າກົມວິທະຍາສາດເຕັກໂນໂລຊີ ແລະ ຮ່ວມມືສາກົນ, ສັງກັດກົມໃຫຍ່ສິນໃນນ້ຳຫວຽດນາມແລ້ວ, ເມື່ອ ຫວຽດນາມ ເຂົ້າເປັນສະມາຊິກຂອງຄະນະກຳມະການອາຊີບຫາປາພາກຕາເວັນຕົກ ແລະ ພາກກາງ ເຂດປາຊີຟີກ ຈະນຳມາເຊິ່ງຜົນປະໂຫຍດໃຫ້ແກ່ທັງສອງຝ່າຍ. ແຫລ່ງຜົນປະໂຫຍດປາທູນາໄດ້ຮັບການຄຸ້ມຄອງຢ່າງແຫນ້ນແຟ້ນ ແລະ ສິ່ງສຳຄັນກວ່ານັ້ນ ແມ່ນຜະລິດຕະພັນປາທູນາສົ່ງອອກຂອງ ຫວຽດນາມ ໄດ້ຮັບການຕີລາຄາຢ່າງຍຸຕິທຳ:

“ມາຮອດຈຸດເວລານີ້ ຫວຽດນາມ ບໍ່ທັນມີເອກະສານນິຕິກຳສະບັບໃດກຳນົດສະເພາະກ່ຽວກັບການເຄື່ອນໄຫວຫາປາທູນາ. ຫວຽດນາມ ພຽງແຕ່ຂຸດຄົ້ນປາທູນາເທົ່ານັ້ນ ຫາກຍັງບໍ່ທັນມີວິທີການຮັກສາ. ດັ່ງນັ້ນໂຄງການນີ້ ຈະຊ່ວຍໃຫ້ພວກເຮົາກວດຄືນລະບົບເອກະສານທັງໝົດຂອງຫວຽດນາມ ທີ່ກ່ຽວຂ້ອງເຖິງປາທູນາ. ພາຍຫລັງຄົ້ນຄ້ວາບົນພື້ນຖານນັ້ນ ບັນດາອົງການຄຸ້ມຄອງລັດ ຈະສະເຫນີຕໍ່ລັດ ຄວນປ່ຽນແປງອັນໃດ. ໃນປີຫນ້າ, ຫວຽດນາມ ຈະມີກົນໄກສະເພາະເພື່ອຄຸ້ມຄອງປາທູນາ.”

ເພື່ອໃຫ້ອາຊີບຫາປາທູນາມະຫາສະມຸດພັດທະນາແບບຍືນຍົງ, ມີລັກສະນະວິຊາສະເພາະ ແລະ ປະຕິບັດຕາມກົດໝາຍສາກົນ, ຂະແຫນງສິນໃນນ້ຳ ຫວຽດນາມ ຕ້ອງສ້າງໃຫ້ມີຂັ້ນຕອນຢ່າງລະອຽດ, ປັບປຸງລະບອບ, ລະບົບກົດໝາຍໃຫ້ສົມບູນແບບໂດຍໄວ ເພື່ອນຳ ຫວຽດນາມ ເຂົ້າເປັນສະມາຊິກຄະນະກຳມະການອາຊີບຫາປາພາກຕາເວັນຕົກ ແລະ ພາກກາງເຂດປາຊີຟີກໂດຍໄວ.

Tag: ປາທູນາ