ແຂວງ ນິງທ້ວນ ໄດ້ລົງທຶນກໍ່ສ້າງພື້ນຖານໂຄງລ່າງ, ຊຸກຍູ້ພັດທະນາເສດຖະກິດ ສັງຄົມ. ບັນດາກິດຈະກຳຈຸດສຸມກ່ຽວກັບຄົມມະນາຄົມ, ຊົນລະປະທານ, ລະບົບລະບາຍນຳ້ ແລະ ບັນດາກິດຈະກຳວັດທະນະທຳ ສັງຄົມທີ່ຈຳເປັນ ໄດ້ຮັບຜັນຂະຫຍາຍລົງທຶນ, ໃນນັ້ນ ມີບາງໂຄງການມີຂອບຂະຫນາດໃຫຍ່ໄດ້ຮັບການກໍ່ສ້າງສຳເລັດ.

ເດືອນເມສາປີ 2024, ໂຄງການລົງທຶນກໍ່ສ້າງເສັ້ນທາງຄວາມໄວສູງ ຕອນ ກາມເລີມ - ຫວີງຫາວ ໄດ້ນຳເຂົ້າເຄື່ອນໄຫວ. ນີ້ແມ່ນໂຄງການຄົມມະນາຄົມຈຸດສຸມ, ເຊື່ອມຕໍ່ເຂດໄປຜ່ານ 3 ແຂວງ: ແຄງຮ່ວາ, ນິງທ້ວນ ແລະ ບິ່ງທ້ວນ ດ້ວຍຍອດຄວາມຍາວແມ່ນ 78,5 km; ໃນນັ້ນ ຕອນຜ່ານແຂວງ ນິງທ້ວນ ມີຄວາມຍາວກວ່າ 63 km ດ້ວຍການອອກແບບ ແມ່ນເສັ້ນທາງ 4 ເລນ. ທ່ານ ຫງວຽນວັນນິງ, ຫົວຫນ້າພະແນກຄົມມະນາຄົມຂົນສົ່ງ ແຂວງ ນິງທ້ວນ ໃຫ້ຮູ້ວ່າ:

“ໃນຊຸມປີຜ່ານມາ, ໂດຍໄດ້ຮັບການຫນູນຊ່ວຍຈາກສູນກາງ ກໍ່ຄືຄວາມເອົາໃຈໃສ່ຂອງຄະນະພັກແຂວງ, ຄະນະກຳມະການປະຊາຊົນແຂວງ ນິງທ້ວນ ກໍ່ສຸມແຫລ່ງກຳລັງເພື່ອລົງທຶນກໍ່ສ້າງພື້ນຖານໂຄງລ່າງຄົມມະນາຄົມ. ນອກນັ້ນ ແຂວງ ກໍ່ນຳໃຊ້ແຫລ່ງກຳລັງເພື່ອສຸມໃສ່ລົງທຶນບັນດາເສັ້ນທາງຄົມມະນາຄົມເຊື່ອມຕໍ່ຈາກເສັ້ນທາງແຄມທະເລ ເສັ້ນທາງຫລວງ ເລກ 1 ຮອດເສັ້ນທາງຄວາມໄວສູງ ເພື່ອສ້າງເປັນເສັ້ນທາງເຊື່ອມຕໍ່”.

ເສັ້ນທາງຄວາມໄວສູງ ເຫນືອ -ໃຕ້ ຕອນຜ່ານ ເຍີນເຊີນ (ເມືອງ ນິງເຊິນ, ແຂວງນິງທ້ວນ". (ພາບ:Báo Ninh Thuận)

ຮອດທ້າຍປີ 2023, ແຂວງ ນິງທ້ວນ ໄດ້ກໍ່ສ້າງເສັ້ນທາງໃຫມ່ເຊື່ອມຕໍ່ລະຫວ່າງແຂວງ, ເມືອງ ດ້ວຍຄວາມຍາວກວ່າ 370 km, ເສັ້ນທາງແຄມທະເລແມ່ນ 105,8 km ປະກອບສ່ວນກໍ່ສ້າງສຳເລັດພື້ນຖານໂຄງລ່າງຄົມມະນາຄົມໂດຍພື້ນຖານ. ແຂວງ ກໍ່ຍູ້ໄວຄວາມຄືບຫນ້າໂຄງການກໍ່ສ້າງເສັ້ນທາງເຊື່ອມຕໍ່ 3 ແຂວງ ເລີມດົ່ງ ນິງທ້ວນ... ທ່ານ ຫງວຽນແທ່ງລອງ, ຮອງຫົວຫນ້າຄະນະຄຸ້ມຄອງໂຄງການລົງທຶນກໍ່ສ້າງບັນດາກິດຈະກຳຄົມມະນາຄົມແຂວງ ນິງທ້ວນ ຊີ້ແຈ້ງວ່າ:

“ໂດຍໄດ້ຮັບຄວາມເອົາໃຈໃສ່ຈາກຄະນະພັກແຂວງ, ຄະນະກຳມະການປະຊາຊົນແຂວງ ແລະ ການຮ່ວມແຮງຮ່ວມໃຈ, ການສົມທົບຂອງບັນດາພະແນກ, ຂະແຫນງການ ທ້ອງຖິ່ນ, ຄະນະຄຸ້ມຄອງໂຄງການລົງທຶນກໍ່ສ້າງບັນດາກິດຈະກຳຄົມມະນາຄົມກໍ່ໄດ້ສຸມແຫລ່ງກຳລັງຜັນຂະຫຍາຍບັນດາໂຄງການລົງທຶນ. ຄາດວ່າ ບັນດາໂຄງການຈະກໍ່ສ້າງສຳເລັດໃນປີ 2025”.

ກ່ຽວກັບທາງການບິນ, ທ່ານນາຍົກລັດຖະມົນຕີ ໄດ້ນຳທ່າອາກາດສະຍານ ແທ່ງເຊິນ ເຂົ້າໃນບັນຊີລາຍຊື່ການວາງແຜນຜັງສັງລວມພັດທະນາລະບົບທ່າອາກາດສະຍານ, ສະຫນາມບິນທົ່ວປະເທດໄລຍະ ປີ 2021 – 2030, ວິໄສທັດຮອດປີ 2050. ໄປຄຽງຄູ່ກັບການລົງທຶນພື້່້ນຖານໂຄງລ່າງ, ແຂວງ ນິງທ້ວນ ພວມກໍ່ສ້າງ ແລະ ພັດທະນາຕົວເມືອງ ຕາມທິດທັນສະໄຫມ, ສະພາບແວດລ້ອມດຳລົງຊີວິດສີຂຽວ, ຍືນຍົງ, ມີສິ່ງອຳນວຍຄວາມສະດວກຢ່າງຄົບຖ້ວນ, ຕອບສະຫນອງຄວາມຮຽກຮ້ອງຕ້ອງການພັດທະນາເສດຖະກິດ - ສັງຄົມ ແລະ ຍົກສູງຄຸນນະພາບການດຳລົງຊີວິດໃຫ້ແກ່ປະຊາຊົນ. ທ່ານ ຫງວຽນຍືງວຽນ, ຮອງຫົວຫນ້າພະແນກກໍ່ສ້າງແຂວງ ນິງທ້ວນ ໃຫ້ຮູ້ວ່າ:

“ສຳລັບບັນດາຂົງເຂດກ່ຽວກັບການພັດທະນາຕົວເມືອງ, ບົນພື້ນຖານຂອງການວາງແຜນຜັງໂດຍໄດ້ຮັບການອະນຸມັດ, ວຽກງານດຶງດູດການລົງທຶນ, ພັດທະນາຕົວເມືອງໃນບໍລິເວນແຂວງ ກໍ່ໄດ້ຮັບການສຸມໃສ່ ແລະ ຜັນຂະຫຍາຍການຮຽກຮ້ອງການລົງທຶນ. ພວກຂ້າພະເຈົ້າເປັນເສນາທິການໃຫ້ແກ່ແຂວງ ປະກາດໃຊ້ການປະຕິບັດ 6 ໂຄງການລົງທຶນເຂດຕົວເມືອງ ແລະ ເຂດຊຸມຊົນຢູ່ບໍລິເວນແຂວງ”.

ເຂດອຸດສາຫະກຳ ຢູລອງ (ເມືອງ ທ່ວນບັກ, ແຂວງນິງທ້ວນ).ພາບ: Báo Ninh Thuận

ເພື່ອພັດທະນາເສດຖະກິດຕົວເມືອງ, ລະບົບພື້ນຖານໂຄງລ່າງເຕັກນິກຕົວເມືອງ ເປັນຕົ້ນແມ່ນບັນດາເຂດຕົວເມືອງໃຫມ່ ແຂວງ ນິງທ້ວນ ໄດ້ລົງທຶນ ແລະ ກໍ່ສ້າງໃຫ້ສຳເລັດເທື່ອລະກ້າວ ຕາມທິດທັນສະໄຫມ, ຄົບຊຸດ, ຮູບການລົງທຶນແມ່ນຫລາຍຮູບແບບ. ຮອດປີ 2023 ທົ່ວແຂວງ ມີ 290 ເສັ້ນທາງຕົວເມືອງ ດ້ວຍຍອດຄວາມຍາວແມ່ນ 339,3 km. ທ່ານ ເຈີນກວັກນາມ, ປະທານ ຄະນະກຳມະການປະຊາຊົນ ແຂວງ ນິງທ້ວນ ເນັ້ນຫນັກວ່າ:

“ກ່ຽວກັບການພັດທະນາເສດຖະກິດຕົວເມືອງ, ແຂວງ ນິງທ້ວນ ໄດ້ມີການກຳນົດທິດຢ່າງຈະແຈ້ງ. ຄະນະກຳມະການປະຊາຊົນ ແຂວງ ໄດ້ປະກາດໃຊ້ໂຄງການດຳເນີນງານ ແລະ ແຜນການປະຕິບັດດ້ວຍບັນດາຫນ້າທີ່, ມາດຕະການລະອຽດ, ຜ່ານນັ້ນ ກໍ່ໃຫ້ບຸລິມະສິດສຸມໃສ່ການລົງທຶນເພື່ອກໍ່ສ້າງ ແລະ ພັດທະນານະຄອນ ຟານຣາງ ທາບຈ່າມ ໃຫ້ກາຍເປັນຕົວເມືອງສີຂຽວ, ທັນສະໄຫມ, ອັດສະລິຍະ, ຕົວເມືອງທ່ອງທ່ຽວ, ການບໍລິການຊີວະພາບ, ຕອບສະຫນອງມາດຖານຂອງຕົວເມືອງປະເພດ 2 ຢ່າງຄົບຖ້ວນ ແລະ ແມ່ນຫນຶ່ງໃນບັນດາຕົວເມືອງຈຸດສຸມຮ່ວມສຳພັນບໍລິເວນ ແລະ ເຂດ”.

ພື້ນຖານໂຄງລ່າງເຂດ, ກຸ່ມອຸດສາຫະກຳ ນິງທ້ວນ ກໍ່ໄດ້ຮັບການຜັນຂະຫຍາຍ, ນັບມື້ນັບໄດ້ຮັບການກໍ່ສ້າງສຳເລັດ. ມາຮອດປະຈຸບັນ ໄດ້ກໍ່ສ້າງ 4 ເຂດອຸດສາຫະກຳ ແລະ 4 ເຂດກຸ່ມອຸດສາຫະກຳ ດ້ວຍຍອດເນື້ອທີ່ ກວ່າ 1.870 ha. ພື້ນຖານໂຄງລ່າງດ້ານການຄ້າໄດ້ຮັບຄວາມເອົາໃຈໃສ່ພັດທະນາ, ເຄືອຂ່າຍການດຳເນີນທຸລະກິດນັບມື້ນັບໄດ້ຮັບການເປີດກວ້າງ ດ້ວຍຫລາຍວິທີການດຳເນີນທຸລະກິດທີ່ສິວິໄລ, ທັນສະໄຫມ, ຕອບສະຫນອງຄວາມຮຽກຮ້ອງຕ້ອງການບໍລິໂພກຂອງປະຊາຊົນ.

32 ປີຜ່ານມາ, ຈາກແຂວງຫນຶ່ງທີ່ຫາກໍ່ສ້າງຕັ້ງໃຫມ່ ຍັງປະສົບກັບຄວາມຫຍຸ້ງຍາກ, ມາຮອດປະຈຸບັນ ແຂວງ ນິງທ້ວນ ບັນລຸໄດ້ບັນດາຜົນງານສຳຄັນໃນທຸກຂົງເຂດ, ໃນນັ້ນ ພື້ນຖານໂຄງລ່າງດ້ານເສດຖະກິດ ສັງຄົມ ໄດ້ຮັບການລົງທຶນນັບມື້ນັບຄົບຊຸດເທື່ອລະກ້າວ, ສ້າງທ່ວງທ່າພັດທະນາກ້າວຂຶ້ນຂອງແຂວງ ໃນອະນາຄົດ.