ຂະແຫນງຕ່ຳແຜ່ນຕັດຫຍິບຫວຽດນາມກຽມພ້ອມເພື່ອເຊື່ອມໂຍງ ເຂົ້າກັບເສດຖະກິດສາກົນ

(vovworld)- ໄລຍະຈະມາເຖິງ, ຫວຽດນາມ ຈະເຂົ້າຮ່ວມລົງນາມໃນສັນຍາການຄ້າສຳຄັນຫລາຍສະບັບຄື: ສັນຍາຄູ່ຮ່ວມມືເສດຖະກິດຂ້າມປາຊີຟີກ

(vovworld)- ໄລຍະຈະມາເຖິງ, ຫວຽດນາມ ຈະເຂົ້າຮ່ວມລົງນາມໃນສັນຍາການຄ້າສຳຄັນຫລາຍສະບັບຄື: ສັນຍາຄູ່ຮ່ວມມືເສດຖະກິດຂ້າມປາຊີຟີກ, ສັນຍາການຄ້າ ຫວຽດນາມ - EU, ສັນຍາການຄ້າເສລີ ຫວຽດນາມ - ສເກົາຫລີ, ສັນຍາການຄ້າເສລີ ຫວຽດນາມ- ພັນທະມິດເສດຖະກິດ ອາຊີ ເອີລົບ. ໃນສະພາບການນັ້ນ, ຂະແຫນງຕ່ຳແຜ່ນຕັດຫຍິບ ຫວຽດນາມ ພວມຢືນຕໍ່ຫນ້າບັນດາກາລະໂອກາດໃຫຍ່ ເພື່ອເຊື່ອມໂຍງເຂົ້າກັບຕະຫລາດໂລກ. ເພື່ອຍາດແຍ່ງຜົນປະໂຫຍດ ຊື່ງບັນດາສັນຍາດັ່ງກ່າວນຳມາໃຫ້, ຂະແຫນງຕ່ຳແຜ່ນຕັດຫຍິບ ຫວຽດນາມ ໄດ້ວາງອອກຫລາຍມາດຕະການ ເພື່ອຮັບກາລະໂອກາດ, ຮັກສາທ່າເຕີບໂຕ. ບົດຂຽນຂອງນັກຂ່າວ ຈູງຖູຍ ທີ່ມີຫົວຂໍ້ວ່າ: ຂະແຫນງຕ່ຳແຜ່ນຕັດຫຍິບຫວຽດນາມກຽມພ້ອມເພື່ອເຊື່ອມໂຍງເຂົ້າກັບເສດຖະກິດສາກົນ.

ພາບປະກອບ:internet

ນັບແຕ່ຕົ້ນປີມາຮອດປະຈຸບັນ, ການສົ່ງອອກເຄື່ອງຕ່ຳແຜ່ນຕັດຫຍິບ ຫວຽດນາມ ບັນລຸວົງເງິນສົ່ງອອກກວ່າ 12,8 ຕື້ USD. ປະຈຸບັນ, ຂະແຫນງຕ່ຳແຜ່ນຕັດຫຍິບພວມແມ່ນຫນຶ່ງໃນບັນດາຂະແຫນງເສດຖະກິດປາຍແຫລມໂດຍໄດ້ຮັບບຸລິມະສິດຈາກລັດ ດ້ວຍຫລາຍນະໂຍບາຍພັດທະນາ. ຂະແຫນງຕ່ຳແຜ່ນຕັດຫຍິບຫວຽດນາມ ຈະມີກາລະໂອກາດຫລາຍຢ່າງໃນອະນາຄົດໃກ້ນີ້ ເມື່ອຫວຽດນາມສຳເລັດການເຈລະຈາ ແລະ ກະກຽມລົງນາມໃນສັນຍາການຄ້າໃຫຍ່ບາງສະບັບ. ໃນນັ້ນ ສະຫະພາບເອີລົບ (EU) ໄດ້ຮັບການຕີລາຄາວ່າ ແມ່ນຕະຫລາດຈຸດສຸມຂອງເຄື່ອງຕ່ຳແຜ່ນຕັດຫຍິບຫວຽດນາມ ເມື່ອສັນຍາການຄ້າເສລີ ຫວຽດນາມ - EU ໄດ້ຮັບການລົງນາມ ຈະສ້າງກຳລັງແກ້ງແຍ້ງໃຫຍ່ໃຫ້ແກ່ເຄື່ອງຕ່ຳແຜ່ນຕັດຫຍິບສົ່ງອອກໄປຍັງຕະຫລາດນີ້. ສຳລັບ ຕະຫລາດ ອາເມລິກາ, ຊື່ງແມ່ນຕະຫລາດສົ່ງອອກໃຫຍ່ສຸດຂອງຫວຽດນາມ ເມື່ອສັນຍາຄູ່ຮ່ວມມືເສດຖະກິດຂ້າມປາຊີຟີກໄດ້ຮັບການລົງນາມ, ອັດຕາພາສີຫລຸດລົງ ແລະ ບັນດາວິສາຫະກິດມີກາລະໂອກາດເພື່ອເປີດກວ້າງອັດຕາສ່ວນຕະຫລາດ. ພ້ອມກັນນັ້ນ ເມື່ອສັນຍາການຄ້າເສລີ ຫວຽດນາມ -ພັນທະມິດເສດຖະກິດ ອາຊີ ເອີລົບ ຫາກໍໄດ້ຮັບການລົງນາມເມື່ອທ້າຍເດືອນ 5 ຜ່ານມາ ມີຜົນສັກສິດ, ວົງເງິນສົ່ງອອກເຄື່ອງຕ່ຳແຜ່ນຕັດຫຍິບຂອງຫວຽດນາມ ຄາດຄະເນວ່າຈະເຕີບໂຕປະມານ 50% ໃນປີທຳອິດ ແລະ ປະມານ 20% ໃນຊຸມປີຕໍ່ໄປ. ເພື່ອຮັບກາລະໂອກາດຈາກບັນດາສັນຍາການຄ້າຫລາຍຝ່າຍ, ສອງຝ່າຍ, ບັນດາວິສາຫະກິດຕ່ຳແຜ່ນຕັດຫຍິບຫວຽດນາມ ໄດ້ກະກຽມແຫລ່ງກຳລັງເພື່ອເຊື່ອມໂຍງເຂົ້າກັບເສດຖະກິດໂລກ. ທ່ານ ຫງວຽນມີງຮ່ວາ, ຜູ້ຕາງຫນ້າ ບໍລິສັດຕັດຫຍິບ ສົ່ງອອກ DHA ໃຫ້ຮູ້ວ່າ:

“ພວກຂ້າພະເຈົ້າກະກຽມຫລາຍບາດກ້າວ. ທີຫນຶ່ງ ກ່ຽວກັບປະເພດຜະລິດຕະພັນ, ພວກຂ້າພະເຈົ້າຄົ້ນຄ້ວາບັນດາຜະລິດຕະພັນເໝາະສົມກັບຕະຫລາດລັດເຊຍ ກໍຄືທ່າໄດ້ປຽບຂອງຕົນ. ທີສອງ ພວກຂ້າພະເຈົ້າຊອກຫາບັນດາຄູ່ຮ່ວມມືເພື່ອຊື້ກົນຈັກມາຜະລິດບັນດາຜະລິດຕະພັນທີ່ມີຄຸນນະພາບສູງກໍຄືຕົ້ນກຳເນີດສິນຄ້າ, ຕອບສະຫນອງຄວາມຮຽກຮ້ອງຕ້ອງການຂອງບັນດາຄູ່ຄ້າ ແລະ ບັນລຸລະດັບພາສີຕ່ຳ.”

ທ່ານເລຕຽນເຈື່ອງ, ຜູ້ອຳນວຍການໃຫຍ່ ກຸ່ມບໍລິສັດຕ່ຳແຜ່ນຕັດຫຍິບຫວຽດນາມ ຖືວ່າ: ຄວາມມານະພະຍາຍາມຂອງບັນດາວິສາຫະກິດໃນການຊອກຫາຕະຫລາດ ໄດ້ເປີດກາລະໂອກາດເພີ່ມວົງເງິນ ແລະ ອັດຕາສ່ວນຕະຫລາດສົ່ງອອກຂອງຂະແຫນງຕ່ຳແຜ່ນຕັດຫຍິບ. ສິ່ງດັ່ງກ່າວໄດ້ຊ່ວຍໃຫ້ຜະລິດຕະພັນຕ່ຳແຜ່ນຕັດຫຍິບ ບໍ່ພຽງແຕ່ມີທີ່ຕັ້ງໝັ້ນຄົງໃນຕະຫລາດສົ່ງອອກເກົ່າເທົ່ານັ້ນ ຫາກຍັງເປີດກາລະໂອກາດຫລາຍຢ່າງຢູ່ຕະຫລາດໃຫມ່ ແລະ ເຄື່ອງຕ່ຳແຜ່ນຕັດຫຍິບຫວຽດນາມ ສາມາດບັນລຸໄດ້ຄາດໝາຍວົງເງິນສົ່ງອອກ 28,5 ຕື້ USD ໃນປີນີ້ ອີກດ້ວຍ. ກ່ຽວກັບແງ່ຫວັງພັດທະນາຂອງຂະແຫນງຕ່ຳແຜ່ນຕັດຫຍິບ ເມື່ອບັນດາສັນຍາການຄ້າເສລີໄດ້ຮັບການລົງນາມ, ພິເສດ ແມ່ນສັນຍາການຄ້າເສລີ ຫວຽດນາມ -ພັນທະມິດ ເສດຖະກິດ ອາຊີ - ເອີລົບ ຫາກໍໄດ້ຮັບການລົງນາມ, ທ່ານ ເລຕຽນເຈື່ອງ ໃຫ້ຮູ້ວ່າ:

“ພັນທະມິດເສດຖະກິດ ອາຊີ - ເອີລົບ ແມ່ນຕະຫລາດນຳເຂົ້າເຄື່ອງຕ່ຳແຜ່ນຕັດຫຍິບປະມານ 13 ຕື້ USD/ປີ. ປີ 2014, ຫວຽດນາມ ສົ່ງອອກໄປຍັງກຸ່ມນີ້ ພຽງ 320 ລ້ານ USD, ອັດຕາສ່ວນຕະຫລາດຂອງເຄື່ອງຕ່ຳແຜ່ນຕັດຫຍິບ ຫວຽດນາມ ປະມານກວ່າ 2%. ຖ້າຍາດແຍ່ງໄດ້ຜົນປະໂຫຍດຂອງສັນຍາ ນັບທັງຮົ້ວກີດຂວາງດ້ານພາສີ, ຫັນລະບຽບການພາສີເປັນງ່າຍດ່າຍ ແນ່ນອນວ່າ ຫວຽດນາມ ມີອັດຕາສ່ວນຕະຫລາດປະມານ 10% ຢູ່ ພັນທະມິດເສດຖະກິດ ອາຊີ -ເອີລົບ ໃນ 5 ປີຈະມາເຖິງ.”

ປະຈຸບັນ, ຈຳນວນບັນດານັກລົງທຶນຕ່າງປະເທດລົງທຶນເຂົ້າຂະແຫນງຕ່ຳແຜ່ນຕັດຫຍິບ ຫວຽດນາມ ຍັງຄົງສືບຕໍ່ເພີ່ມຂຶ້ນ. ເຖິງຢ່າງໃດກໍຕາມ ຄຽງຄູ່ກັບບັນດາກາລະໂອກາດ, ຂະແຫນງຕ່ຳແຜ່ນຕັດຫຍິບຫວຽດນາມ ຕ້ອງປະເຊີນຫນ້າກັບຄວາມຫຍຸ້ງຍາກ ແລະ ສິ່ງທ້າທາຍບໍ່ແມ່ນຫນ້ອຍ. ນັ້ນແມ່ນ ບັນດາສັນຍາການຄ້າເສລີ ນັບມື້ນັບມີຂໍ້ກຳນົດທີ່ເຄັ່ງຄັດຫລາຍຢ່າງ,ຮຽກຮ້ອງຄຳໝັ້ນສັນຍາຕ້ອງມີລະດັບຢ່າງເລິກເຊິ່ງ ກວ້າງຂວາງ ນັບທັງດ້ານການຄ້າ, ບໍລິການ, ການລົງທຶນ, ຊັບສິນທາງປັນຍາ. ກ່ຽວກັບການແກ້ໄຂຄວາມຫຍຸ້ງຍາກ ແລະ ກະກຽມໃຫ້ການເຂົ້າຮ່ວມບັນດາສັນຍາການຄ້າເສລີ, ທ່ານນາງ ດັ້ງກີມຢູງ, ເລຂາທິການໃຫຍ່ສະຫະສະມາຄົມຕ່ຳແຜ່ນຕັດຫຍິບຫວຽດນາມ ໃຫ້ຮູ້ວ່າ:

“ພວກຂ້າພະເຈົ້າຮຽກຮ້ອງບັນດາວິສາຫະກິດຢູ່ພາຍໃນ ແລະຕ່າງປະເທດ ລົງທຶນແກ້ໄຂບັນດາຈຸດອ່ອນ. ທີສອງ ຕ້ອງເພີ່ມທະວີການຮ່ວມສຳພັນໃນຂະແຫນງ ລະຫວ່າງບັນດາບໍລິສັດຕັດຫຍິບກັບບັນດາບໍລິສັດຜະລິດວັດຖຸດິບ. ເຮັດໄດ້ຄືແນວນັ້ນ ພວກເຮົາຈຶ່ງຕອບສະຫນອງບັນຫາຕົ້ນກຳເນີດຂອງສິນຄ້າ ແລະ ໄດ້ຊົມໃຊ້ຜົນປະໂຫຍດຈາກສັນຍາການຄ້າເສລີກໍຄືສັນຍາຄູ່ຮ່ວມມືຂ້າມປາຊີຟີກ.”

ບັນດາສັນຍາການຄ້າເສລີ ດ້ວຍການບຸລິມະສິດໃຫຍ່ ໄດ້ເປີດກາລະໂອກາດຫລາຍຢ່າງໃຫ້ຂະແຫນງຕ່ຳແຜ່ນຕັດຫຍິບຫວຽດນາມ ໃນການເຊື່ອມໂຍງ ແລະ ແຊກຊືມເຂົ້າຕະຫລາດໂລກ. ນີ້ແມ່ນບາດລ້ຽວ ແລະ ກະຕຸກຊຸກຍູ້ໃຫ້ແກ່ຂະແຫນງອຸດສາຫະກຳຕົ້ນຕໍຂອງຫວຽດນາມ ໃນສະພາບການເຊື່ອມໂຍງເຂົ້າກັບເສດຖະກິດໂລກ. ເພື່ອຍາດແຍ່ງທ່າໄດ້ປຽບຢ່າງສຸດຂີດ ຊື່ງບັນດາສັນຍານຳມາໃຫ້, ນອກຈາກການຫນູນຊ່ວຍຂອງລັດ, ບັນດາວິສາຫະກິດຕ່ຳແຜ່ນຕັດຫຍິບ ຄວນມານະພະຍາຍາມກວ່າອີກ ແລະ ມີການລົງທຶນ, ດັດປັບເຕັກໂນໂລຊີ, ຮູບແບບ, ຄຸນນະພາບຜະລິດຕະພັນ ເພື່ອພັດທະນາ ແລະ ມີທີ່ຕັ້ງຢ່າງໝັ້ນຄົງໃນຕະຫລາດໂລກ