ປ່າສະຫງວນແຫ່ງຊາດເຟຍອວັກ,ເຟຍແດນ

ສວນສາທາລະນະທໍລະນີພູຜາແມ່ນ້ຳລຳເຊກາວບັ່ງ ນອນຢູ່ຕອນດິນເໜືອສຸດຂອງ ຫວຽດນາມ ຫ່າງຈາກ ຮ່າໂນ້ຍ ປະມານ 300 ກິໂລແມັດ ແລະ ມີເນື້ອທີ່ກວ້າງເກືອບ 3.300 ຕາລາງກິໂລແມັດ ກວມເອົາບໍລິເວນ 9 ເມືອງ, ມີກວ່າ 130 ຈຸດມໍລະດົກທໍລະນີທີ່ເປັນເອກະລັກ ແລະ ມີຄຸນຄ່າລະດັບສາກົນຄື ທາດຕ່າງໆ, ຮ່ອມພູ, ຖ້ຳ, ລະບົບແມ່ນຳ້ລຳເຊ, ຖ້ຳໃຕ້ດິນທີ່ເຊື່ອມຕໍໍ່ກັນ. ຕາມໄລຍະປະຫວັດສາດ, ສວນສາທາລະນະທໍລະນີພູຜາແມ່ນ້ຳລຳເຊກາວບັ່ງ ກາຍເປັນເຂດດິນທີ່ຫາຍາກ, ມີອາຍຸ 500 ລ້ານກວ່າປີຂອງໜ່ວຍພິພົບ. ຜ່ານການເປັນຮູບປະທຳ ແລະ ຂະຫຍາຍຕົວນັບລ້ານປີ, ຢູ່ແຫ່ງນີ້ໄດ້ຮັບຖືວ່າແມ່ນສະຖານທີ່ ທີ່ມີພູມີສັນຖານທໍລະນີອຸດົມສົມບູນ ເຊິ່ງຖືກຕັດແຍກດ້ວຍບັນດາສາຍພູຫີນປູນ ແລະ ພູດິນ, ມີບັນດາຮ່ອມພູຫາບພຽງ ແລະ ນຳ້ຕົກຕາດທີ່ໃຫ່ຍໂຕມະໂຫຖານ ເຊິ່ງແມ່ນບ່ອນຕັ້ງຖິ່ນຖານຂອງພໍ່ແມ່ພີ່ນ້ອງບັນດາເຜົ່າສ່ວນໜ້ອຍ. ໃນບໍລິເວນສວນສາທາລະນະແຫ່ງນີ້ ກໍ່ມີທິວທັດທຳມະຊາດທີ່ລືຊື່ເຊັ່ນ: ເຂດທ່ອງທ່ຽວທຳມະຊາດ ເຟຍອວັກ,ເຟຍແດນ, ກຸ່ມໜອງທາງແຮນ,… ແລະ ພິເສດແມ່ນນ້ຳຕົກຕາດບານຢົກເຊິ່ງແມ່ນໜຶ່ງໃນ 4 ນ້ຳຕົກຕາດເຂດຊາຍແດນໃຫຍ່ ແລະ ງາມທີ່ສຸດໃນໂລກ. ສວນສາທາລະນະທໍລະນີແຫ່ງນີ້ ຍັງແມ່ນເຂດດິນທີ່ມີໄລຍະປະຫວັດສາດ ວັດທະນະທຳມາແຕ່ດົນນານ ເຊິ່ງລວມມີຫຼາຍກວ່າ 215 ສະຖານທີ່ວັດທະນະທຳປະຫວັດສາດຖືກຈັດອັນດັບ, ໃນນັ້ນມີ 3 ປູຊະນີຍະສະຖານລະດັບຊາດພິເສດຂອງຫວຽດນາມ. ແຕ່ຫຼາຍປີມານີ້, ພ້ອມກັບການອະນຸລັກຮັກສາ ແລະ ເສີມຂະຫຍາຍບັນດາຄຸນຄ່າມໍລະດົກທໍລະນີ, ວັດທະນະທຳ, ປະຫວັດສາດນອນໃນເຂດສວນສາທາລະນະທໍລະນີ, ແຂວງ ກາວບັ່ງ ໄດ້ສ້າງເປົ້າໝາຍຕິດພັນກັບການພັດທະນາການທ່ອງທ່ຽວແບບຍືນຍົງ. ດ້ວຍບັນດາຄວາມພະຍາຍາມຂອງທ້ອງຖິ່ນ, ມາເຖິງເດືອນ ເມສາ ປີ 2018, ອົງການ Unesco ໄດ້ຮັບຮອງສວນສາທາລະນະທໍລະນີພູຜາແມ່ນ້ຳລຳເຊກາວບັ່ງ ແມ່ນສວນສາທາລະນະທໍລະນີທົ່ວໂລກ. ທ່ານ ເຈືອງເຖວິງ ຮອງຫົວພະແນກວັດທະນະທຳ ກິລາ ແລະ ທ່ອງທ່ຽວແຂວງ ກາວບັ່ງ ຫົວໜ້າຄຸ້ມຄອງ ສວນສາທາລະນະທໍລະນີທົ່ວໂລກ Unesco ພູຜາແມ່ນ້ຳລຳເຊກາວບັ່ງ ໃຫ້ຮູ້ວ່າ:

“ໄລຍະທີໜຶ່ງ ກາວບັ່ງໄດ້ສຳເລັດການກໍ່ສ້າງສວນສາທາລະນະທໍລະນີ ຕາມມາດຖານຂອງ Unesco. ໃນໄລຍະທີ່ຈະມາເຖິງ ຈະສືບຕໍ່ເຊື້ອເຊີນຜູ້ຊ່ຽວຊານ Unesco ມາໃຫ້ຄຳປຶກສາ ເພື່ອສ້າງແຜນການພັດທະນາສັງລວມ, ທັງຮັບປະກັນການຕິດພັນກັບການພັດທະນາແບບຍືນຍົງ, ເສີມຂະຫຍາຍບັນດາຄຸນຄ່າທີ່ມີຢູ່ແລ້ວ ຂອງສວນສາທາລະນະທໍລະນີ. ໃນນັ້ນເລັ່ງໃສ່ການເພີ່ມທະວີ ການລົງທຶນກໍ່ສ້າງພື້ນຖານໂຄງລ່າງທາງດ້ານວັດຖຸ, ສຸມໃສ່ພັດທະນາລະບົບຄູ່ຮ່ວມມື, ຂະຫຍາຍລະບົບຜະລິດຕະພັນ ເພື່ອຮັບປະກັນເພີ່ມທະວີວຽກເຮັດງານທຳໃຫ້ແກ່ຊາວທ້ອງຖິ່ນ”.

ພ້ອມກັບການພັດທະນາແບບຍືນຍົງ, ເສີມຂະຫຍາຍບັນດາຄຸນຄ່າທີ່ມີຢູ່ແລ້ວສວນສາທາລະນະທໍລະນີ, ໃນໄລຍະທີ່ຈະມາເຖິງ, ແຂວງ ກາວບັ່ງ ຈະເລັ່ງໃສ່ຂຸດຄົ້ນ 3 ສາຍທ່ອງທ່ຽວໃນບໍລິເວນສວນສາທາລະນະທໍລະນີ ເພື່ອດຶງດູດແຂກທ່ອງທ່ຽວ ນັ້ນແມ່ນສາຍທ່ອງທ່ຽວກຸ່ມທາງກ້ຳຕາເວັນຕົກ “ ຄົ້ນຫາ ເຟຍ ອວັກ-ເຂດພູສູງແຫ່ງການປ່ຽນແປງ”; ສາຍທ່ອງທ່ຽວກຸ່ມທາງທິດເໜືອ “ການເດີນທາງມຸ່ງໄປສູ່ກົກເຄົ້າເຫງົ້າກໍ” ແລະ ສາຍທ່ອງທ່ຽວກຸ່ມທາງກ້ຳຕາເວັນຕາເວັນອອກ “ລົງຕົວຈິງຢູ່ຕາມໜູ່ບ້ານໃນເຂດແດນສະຫວັນ”. ທ່ານ ຮວ່າງແມັ້ງງອັກ ຜູ້ອຳນວຍການບໍລິສັດ ມ່ຽນເຕິຍ ຈຳກັດ ເຊິ່ງແມ່ນຫົວໜ່ວຍຜູ້ຮ່ວມມືສວນສາທາລະນະທໍລະນີພູຜາແມ່ນ້ຳລຳເຊກາວບັ່ງ ຖືວ່າ:

“ເມື່ອກາວບັ່ງໄດ້ຮັບການຮັບຮອງຈາກ Unesco ວ່າແມ່ນ ສວນສາທາລະນະທໍລະນີທົ່ວໂລກ ຈະເປີດທິດທາງໃໝ່ໃຫ້ແກ່ການທ່ອງທ່ຽວແຂວງ ກາວບັ່ງ. ເພື່ອນມິດສາກົນຈະຮູ້ຈັກເຖິງກາວບັ່ງ ນັ້ນແມ່ນສະຖານທີ່ທ່ອງທ່ຽວທີ່ເປັນເອກະລັກ. ຂ້າພະເຈົ້າຄິດວ່າໃນໄລຍະທີ່ຈະມາເຖິງ ການທ່ອງທ່ຽວຢູ່ແຂວງ ກາວບັ່ງ ຈະພັດທະນາຫຼາຍກວ່າ. ພ້ອມກັບການລົງທຶນກໍ່ສ້າງພື້ນຖານໂຄງລ່າງ, ພວກຂ້າພະເຈົ້າຈະສືບຕໍ່ລົງທຶນສ້າງບັນດາຜະລິດຕະພັນທ່ອງທ່ຽວ ເພື່ອຕອບສະໜອງຄວາມຕ້ອງການໃນການພັດທະນາ ແລະ ຮັບໃຊ້ແຂກທ່ອງທ່ຽວ”.

ປັດຈຸບັນ ອຳນາດການປົກຄອງ ແລະ ປະຊາຊົນແຂວງ ກາວບັ່ງ ພ້ອມກັບບັນດາວິສາຫະກິດ ພວມເສີມຂະຫຍາຍທ່າໄດ້ປຽບຂອງສວນສາທາລະນະທໍລະນີທົ່ວໂລກ Unesco ພູຜາແມ່ນ້ຳລຳເຊກາວບັ່ງ, ຊຸກຍູ້ຄວາມສາມາດບົ່ມຊ້ອນພັດທະນາການທ່ອງທ່ຽວ, ດຶງດູດແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດມາກາວບັ່ງ ໃຫ້ນັບມື້ນັບຫຼາຍຂຶ້ນ, ອັນນຳຂະແໜງທ່ອງທ່ຽວກາວບັ່ງ ກາຍເປັນເຄື່ອງໝາຍທ່ອງທ່ຽວເຂດພູສູງທາງທິດເໜືອ ຫວຽດນາມ.