ເຂົ້າຮ່ວມສັນຍາ FTA ແລະ ກາລະໂອກາດເພື່ອໃຫ້ຫວຽດນາມ ສ້າງໂຄງປະກອບຕະຫລາດຄືນໃຫມ່

(vovworld)- ຫວຽດນາມ ພວມກ້າວເຂົ້າສູ່ໄລຍະເຊື່ອມໂຍງຢ່າງເລິກເຊິ່ງ, ກວ້າງຂວາງເຂົ້າກັບບັນດາພາກພື້ນ

(vovworld)- ຫວຽດນາມ ພວມກ້າວເຂົ້າສູ່ໄລຍະເຊື່ອມໂຍງຢ່າງເລິກເຊິ່ງ, ກວ້າງຂວາງເຂົ້າກັບບັນດາພາກພື້ນ, ພື້ນຖານເສດຖະກິດໃຫຍ່ຂອງໂລກ ເມື່ອສັນຍາການຄ້າເສລີ FTA ຫລາຍສະບັບ ໄດ້ ແລະ ພວມກະກຽມໄດ້ຮັບການລົງນາມ. ຄຽງຄູ່ບັນດາບຸລິມະສິດຈະໄດ້ຊົມໃຊ້ຈາກບັນດາສັນຍາ FTA, ບັນດາວິສາຫະກິດ ຫວຽດນາມ ກໍປະເຊີນຫນ້າກັບສິ່ງທ້າທາຍຫລາຍຢ່າງ ແລະ ມີຫລາຍວຽກຕ້ອງເຮັດ ເພື່ອຮັບກາລະໂອກາດໃຫຍ່ຫລວງດັ່ງກ່າວ. ນີ້ກໍແມ່ນກາລະໂອກາດເພື່ອໃຫ້ຫວຽດນາມ ສ້າງໂຄງປະກອບຕະຫລາດ ກໍຄືພື້ນຖານເສດຖະກິດຄືນໃຫມ່.

ປະຈຸບັນ, ຫວຽດນາມ ໄດ້ລົງນາມໃນສັນຍາການຄ້າເສລີສອງຝ່າຍ ແລະຫລາຍຝ່າຍ 10 ສະບັບ. ໃນນັ້ນ ມີ 2 ສະບັບຫາກໍໄດ້ຮັບການລົງນາມ ນັ້ນແມ່ນ ສັນຍາການຄ້າເສລີ ຫວຽດນາມ - ສເກົາຫລີ ແລະ ສັນຍາການຄ້າເສລີ ຫວຽດນາມ ພັນທະມິດ ອາຊີ ເອີລົບ. ບັນດາສັນຍາການຄ້າເສລີໄດ້ນຳມາເຊິ່ງກາລະໂອກາດໃຫມ່ໃຫ້ແກ່ວິສາຫະກິດ, ສ້າງເງື່ອນໄຂໃຫ້ບັນດາວິສາຫະກິດພັດທະນາ, ເປັນຕົ້ນເມື່ອບັນດາປະເທດເຂົ້າຮ່ວມສັນຍາລົບລ້າງພາສີນຳເຂົ້າ. ສັນຍາ ແມ່ນກາລະໂອກາດເພື່ອໃຫ້ວິສາຫະກິດຫວຽດນາມ ເຂົ້າຮ່ວມລະບົບສະຫນອງສິນຄ້າຂອງບັນດາຄູ່ຮ່ວມມື, ສິ່ງດັ່ງກ່າວຈະຊ່ວຍວິສາຫະກິດດຳເນີນທຸລະກິດເປັນປົກກະຕິ, ຍົກສູງກຳລັງແກ້ງແຍ້ງ. ພ້ອມກັນນັ້ນ ຊ່ວຍຫວຽດນາມ ສ້າງໂຄງປະກອບ ແລະ ການດຸ່ນດ່ຽງລະຫວ່າງຕະຫລາດນຳເຂົ້າ ແລະ ສົ່ງອອກ, ຫລີກລ້ຽງການອີງໃສ່ຕະຫລາດໃດຫນຶ່ງ. ເມື່ອເຂົ້າຮ່ວມສັນຍາການຄ້າເສລີ, ວິສາຫະກິດຫວຽດນາມ ຈະເປີດຫລາຍປະຕູໃຫ້ຕະຫລາດສົ່ງອອກ. ສຳລັບພື້ນຖານເສດຖະກິດພວມໃນທ່າພັດທະນາຄືຫວຽດນາມ ເລື່ອງເປີດກວ້າງຕະຫລາດແມ່ນສຳຄັນທີ່ສຸດ. ທ່ານນາງ ດັ້ງເຟືອງຢູງ, ເລຂາທິການໃຫຍ່ ສະຫະສະມາຄົມຕ່ຳແຜ່ນຕັດຫຍິບ ຫວຽດນາມ ຖືວ່າ: ສັນຍາການຄ້າເສລີແມ່ນກາລະໂອກາດ, ແມ່ນກຳລັງຫນູນເພື່ອສືບຕໍ່ພັດທະນາວິສາຫະກິດ, ຍົກສູງຄວາມສາມາດແກ້ງແຍ້ງ. ນີ້ແມ່ນສັນຍາເມື່ອບັນດາວິສາຫະກິດເຂົ້າຮ່ວມຕ້ອງປ່ຽນໃຫມ່ຈີນຕະນາການ ແລະ ວິທີການດຳເນີນທຸລະກິດ. ທ່ານນາງ ດັ້ງເຟືອງຢູງ ໃຫ້ຮູ້ວ່າ:

“ຄວາມຕ້ອງການກ່ຽວກັບຕົ້ນກຳເນີດສິນຄ້າຂອງຝ່າຍນຳເຂົ້າຍາມໃດກໍສູງ. ນີ້ກໍແມ່ນສິ່ງທ້າທາຍສຳລັບຂະແຫນງຕ່ຳແຜ່ນຕັດຫຍິບ. ບັນດາວິສາຫະກິດຫວຽດນາມ ສ່ວນຫລາຍແມ່ນນຳເຂົ້າວັດຖຸດິບເພື່ອສົ່ງອອກ.”

ດ້ວຍວິວັດການຫລຸດຜ່ອນບັນດາປະເພດພາສີຕາມຄຳໝັ້ນສັນຍາ, ມີຜະລິດຕະພັນກະເສດຫລາຍປະເພດຂອງຫວຽດນາມ ຈະຖືກຜົນກະທົບຢ່າງແຮງ. ດ້ານອື່ນ, ຂະແຫນງອຸດສາຫະກຳຈຳນວນຫນຶ່ງຄື: ລົດໂອໂຕ, ເຫລັກກ້າ, ເຄື່ອງຕ່ຳແຜ່ນຕັດຫຍິບ ຕ້ອງແກ້ງແຍ້ງຢ່າງຂ້ຽວຂາດກັບຜະລິດຕະພັນຂອງບັນດາປະເທດພາຍໃນພາກພື້ນ. ເພື່ອຍາດແຍ່ງບັນດາບຸລິມະສິດເປັນຢ່າງດີ ບັນດາວິສາຫະກິດຄວນຄົ້ນຄ້ວາ,ຊອກຮູ້, ອັບດັດບັນດາຂໍ້ກຳນົດກໍຄືຄຳໝັ້ນສັນຍາໃນສັນຍາການຄ້າເສລີ. ການເຊື່ອມໂຍງແມ່ນກຳລັງຫນູນເພື່ອໃຫ້ຫວຽດນາມປະຕິບັດການສ້າງໂຄງປະກອບຄືນໃຫມ່, ປະກອບສ່ວນເຂົ້າໃນການເຕີບໂຕເສດຖະກິດ, ພ້ອມທັງເປີດກວ້າງຕະຫລາດສົ່ງອອກສິນຄ້າ, ເພີ່ມທ່າໄດ້ປຽບໃນການແກ້ງແຍ້ງໃຫ້ແກ່ສິນຄ້າສົ່ງອອກຂອງຫວຽດນາມເມື່ອທຽບໃສ່ບັນດາປະເທດໃນພາກພື້ນ. ທ່ານ ດັ້ງຮ່ວາງຫາຍ, ຫົວຫນ້າກົມຕະຫລາດເອີລົບ, ກະຊວງອຸດສາຫະກຳການຄ້າ ຖືວ່າ:

“ການຫນູນຊ່ວຍຈາກສັນຍານີ້ ແມ່ນວາງອອກວິວັດການເໝາະສົມເພື່ອໃຫ້ບັນດາຂະແຫນງພາຍໃນປະເທດສາມາດຮ່ວມມືລົງທຶນ, ປ່ຽນໃຫມ່ເຕັກໂນໂລຊີ, ຮັບປະກັນໃຫ້ບັນດາຜະລິດຕະພັນມີກຳລັງແກ້ງແຍ້ງ. ເມື່ອເຊື່ອມໂຍງເຂົ້າກັບເສດຖະກິດສາກົນ ກຳລັງດັນແມ່ນຮັບປະກັນໃຫ້ສິນຄ້າຂອງຫວຽດນາມພັດທະນາໄດ້, ຮັບປະກັນລັກສະນະແກ້ງແຍ້ງຂອງຕະຫລາດສາກົນ. ກຳລັງດັນນີ້ອາດຈະຊ່ວຍໃຫ້ຫວຽດນາມ ສ້າງໂຄງປະກອບຄືນໃຫມ່, ປ່ຽນໃຫມ່ເຕັກໂນໂລຊີ ແລະ ນຳມາເຊິ່ງກຳລັງແກ້ງແຍ້ງໃຫ້ສິນຄ້າຂອງຫວຽດນາມ.”

ສັນຍາການຄ້າເສລີ ທັງຊ່ວຍວິສາຫະກິດຫວຽດນາມເຊື່ອມໂຍງເຂົ້າກັບໂລກ, ທັງແມ່ນກາລະໂອກາດເພື່ອໃຫ້ບັນດາວິສາຫະກິດ ຕີລາຄາຕົນເອງຄືນໃຫມ່, ຕອບສະຫນອງບັນດາຄຳຮຽກຮ້ອງຕ້ອງການທີ່ເຄັ່ງຄັດຂອງບັນດາບໍລິສັດນຳເຂົ້າ. ເພື່ອບັນລຸໄດ້ຜົນສຳເລັດ ວິທີຫນຶ່ງດຽວເພື່ອໃຫ້ວິສາຫະກິດບືນຂຶ້ນ ແລະ ຢືນຢັນທີ່ຕັ້ງໃນຕະຫລາດສາກົນ ນັ້ນແມ່ນຄວນເປັນເຈົ້າການກວ່າໃນການຊອກຮູ້ບັນດາກົນໄກນະໂຍບາຍກໍຄືຊອກບັນດາຄູ່ຮ່ວມມືໃຫ້ເໝາະສົມ. ທ່ານ ລືວບີກໂຮ່, ອະດີດຫົວຫນ້າສະຖາບັນຍຸດທະສາດພັດທະນາ, ສັງກັດກະຊວງແຜນການ ແລະ ການລົງທຶນ ຖືວ່າ: ເພື່ອກະກຽມໃຫ້ຍຸດທະສາດເຊື່ອມໂຍງ ແລະ ໂລກາພິວັດ, ວິສາຫະກິດຕ້ອງແກ້ງແຍ້ງ, ປ່ຽນໃຫມ່ຢ່າງບໍ່ຢຸດຢັ້ງ ແລະ ມີຫົວຄິດປະດິດສ້າງ. ພ້ອມກັນນັ້ນ, ຕັ້ງຫນ້າຊອກຮູ້ຕະຫລາດຢ່າງຈະແຈ້ງ, ເຂົ້າໃຈໄດ້ຄວາມຕ້ອງການຂອງຕະຫລາດຊື່ງຕົນເອງຈະສົ່ງສິນຄ້າໄປຂາຍເພື່ອມີຍຸດທະສາດ, ແຜນການປະຕິບັດຢ່າງລະອຽດ. ທ່ານ ລືວບີກໂຮ່ ເນັ້ນຫນັກວ່າ:

“ໄລຍະຜ່ານມາ, ວິສາຫະກິດຫວຽດນາມ ໄດ້ແຊກຊືມ ແລະ ມີທີ່ຕັ້ງຢູ່ຕະຫລາດຫລາຍປະເທດ ແລະ ເຂດແຄ້ວນໃນໂລກ ແຕ່ຄວາມຮຽກຮ້ອງຕ້ອງການຂອງເຂົາເຈົ້ານັບມື້ນັບສູງ ສະນັ້ນ ພວກເຮົາຕ້ອງພະຍາຍາມເພື່ອຫັນສິ່ງທ້າທາຍເປັນກາລະໂອກາດແຮງກວ່າ ແລະ ດີກວ່າເພື່ອໃຫ້ມີບາດກ້າວພັດທະນາ.”

ກາລະໂອກາດຈາກການເຂົ້າຮ່ວມສັນຍາການຄ້າເສລີທີ່ສະຫງວນໃຫ້ແກ່ບັນດາວິສາຫະກິດຫວຽດນາມ ພວມໃກ້ຈະຮອດແລ້ວ. ເພາະສະນັ້ນ ວິສາຫະກິດຫວຽດນາມ ໄດ້ ແລະ ພວມ ຍູ້ແຮງການປະຕິຮູບ, ເປັນເຈົ້າການຫັນທິດລົງທຶນ, ຍົກສູງລະດັບຄວາມຮູ້, ຖ່າຍທອດເຕັກໂນໂລຊີ ເພື່ອເພີ່ມຄວາມສາມາດແກ້ງແຍ້ງ, ຍົກສູງປະສິດທິຜົນການຜະລິດດຳເນີນທຸລະກິດ. ນອກຈາກ ໄດ້ຮັບບຸລິມະສິດຈາກສັນຍາ, ນີ້ແມ່ນກາລະໂອກາດໃຫຍ່ເພື່ອໃຫ້ຫວຽດນາມ ສ້າງໂຄງປະກອບຕະຫລາດຄືນໃຫມ່, ສ້າງການຫັນປ່ຽນຢ່າງແຮງ ແລະ ມີກຳລັງແຮງຢ່າງພຽງພໍເພື່ອອອກສູ່ຕະຫລາດໂລກ.