យុវជន Ngo Quy Duc គឺជាស្ថាបនិកនៃគម្រោង វិលត្រឡប់មកភូមិវិញ

Ngo Quy Duc កើតនៅឆ្នាំ ១៩៨៥ នៅទីក្រុងហាណូយ។ នៅពាក់កណ្តាលឆ្នាំ ២០០៦ បន្ទាប់ពីបញ្ចប់ការសិក្សានៅសកលវិទ្យាល័យ, លោកបានកើតចេញគំនិតអនុវត្តន៍នូវគម្រោងវប្បធម៌មួយនៅទីក្រុងហាណូយ។ ហើយលោកបានចាប់ផ្តើមស្វែងរកដៃគូសម្រាប់បង្កើតគម្រោង “ហាណូយរបស់ខ្ញុំ” ដែលគម្រោងនេះ ប្រៀបដូចជាបណ្ណាល័យអនឡាញអំពីវប្បធម៌ហាណូយអញ្ជឹង។ នៅខែឧសភាឆ្នាំ ២០២១ គម្រោង “វិលត្រឡប់មកភូមិវិញ” របស់លោក Ngo Quy Duc ត្រូវបានបង្ហាញមុខជាផ្លូវការ។ នេះគឺជាគេហទំព័រដែលបង្ហោះព័ត៌មានអំពីភូមិសិប្បកម្មប្រពៃណី និងឧទ្ទេសនាមផលិតផលសិប្បកម្មក្នុងប្រទេស។

“តាំងពីឆ្នាំ២០០៦ ខ្ញុំមានគំនិតចង់ធ្វើអ្វីមួយអំពីទីក្រុងហាណូយ។ ខ្ញុំបានមកជួបអ្នកស្រាវជ្រាវវប្បធម៌អំពីហាណូយ លោក Nguyen Vinh Phuc ហើយទទួលបានការចែករំលែកនិងផ្តល់យោបល់លើគម្រោង “ហាណូយរបស់ខ្ញុំ”។ បន្ទាប់ពីគម្រោងនេះ ខ្ញុំពិតជាមានការជក់ចិត្តនិងមានការចាប់អារម្មណ៍យ៉ាងខ្លាំងចំពោះមុខរបសិប្បកម្មវៀតណាម។ ដូច្នេះហើយ ខ្ញុំបានកសាងគម្រោងអំពីភូមិ ដោយប្រមូលនូវចំណេះដឹងទាំងអស់ដែលខ្ញុំបានប្រមូលពីមុនមកអំពីភូមិសិប្បកម្មជុំវិញទីក្រុងហាណូយ ហើយបើកទូលាយជាងនេះគឺបណ្តាខេត្តភាគខាងជើង ភាគកណ្តាល និងខាងត្បូងនៃប្រទេសវៀតណាម។ ក្នុងដំណើររបស់ខ្ញុំពីឆ្នាំ ២០០៦ ដល់ពេលនេះ ខ្ញុំបានទៅលេងភូមិសិប្បកម្មជាង ៥០០ កន្លែង។ ភូមិសិប្បកម្មនីមួយៗមានរឿងដោយឡែករបស់ខ្លួន ហើយមានភូមិសិប្បកម្មដែលបន្សល់ទុកនូវចំណាប់អារម្មណ៍យ៉ាងជ្រាលជ្រៅនៅក្នុងដួងចិត្តរបស់ខ្ញុំ។ តាមរយៈដំណើរកម្សាន្តនីមួយៗ ខ្ញុំឃើញថា ថ្វីដៃរបស់សិប្បករពិតជាពូកែខ្លាំងណាស់ ពួកគេមានបច្ចេកទេសបន្សល់ទុកមកពីជំនាន់ដូនតា ហើយត្រូវបានពូនជ្រុំជាច្រើនជំនាន់មក បង្កើតបានជាផលិតផលទំនើប សក្តិសមលំដាប់ពិភពលោក”។

ដោយក្តីស្រមើស្រមៃចង់អភិរក្ស និងផ្សព្វផ្សាយតម្លៃភូមិសិប្បកម្មប្រពៃណី យុវជន Ngo Quy Duc បានចំណាយពេលជាច្រើនឆ្នាំធ្វើដំណើរទៅកាន់តំបន់ជនបទនានា ដើម្បីអនុវត្តគម្រោង “វិលត្រឡប់ទៅភូមិវិញ”។ លោកបានក្លាយជា "ស្ពាន" ជំរុញទំនាក់ទំនងរវាងភូមិសិប្បកម្មនិងអាជីវកម្ម បើកឱកាសដើម្បីចូលទៅកាន់ទីផ្សារ ជួបប្រាស្រ័យរវាងសិប្បករជាមួយអាជីវកម្ម។ ជោគជ័យដ៏ធំបំផុតនៃគម្រោង “វិលត្រឡប់ទៅភូមិវិញ” គឺទទួលបានប្រជាប្រិយភាពខ្លាំងពីបណ្តាភូមិសិប្បកម្ម ការគាំទ្ររបស់សិប្បករជាច្រើនដែលមានបំណងប្រាថ្នាចង់អភិរក្សនិងផ្សព្វផ្សាយវប្បធម៌ប្រពៃណី។ សិប្បការិនី Nguyen Thi Tuyet នៅឃុំ Van Canh ស្រុក Hoai Duc ទីក្រុងហាណូយបានឲ្យដឹងថា៖ “ខ្ញុំមានទំនុកចិត្តយ៉ាងខ្លាំងចំពោះ Duc ព្រោះយុវជនរូបនេះមានចំណង់ចំណូលចិត្តនឹងឧបករណ៍លេងល្បែងប្រជាប្រិយវៀតណាម។ ខ្ញុំមានអារម្មណ៍រីករាយដែលបានធ្វើការជាមួយ Duc។ ខ្ញុំសង្ឃឹមថា មានយុវជនជាច្រើនដូច Duc ចូលរួមរក្សាអាជីពធ្វើឧបករណ៍លេងប្រជាប្រិយ”។

ការរៀបចំកន្លែងតាំងបង្ហាញផលិតផលសិប្បកម្មនៃគម្រោង “ត្រឡប់ទៅភូមិវិញ” នៅផ្លូវ Chau Long ខ័ណ្ឌ Ba Dinh ទីក្រុងហាណូយ

កម្មវិធី "វិលត្រលប់ទៅភូមិវិញ" ផ្តោតលើការរំលេចប្រវត្តិសាស្រ្តវប្បធម៌របស់ភូមិ និងពិពិធកម្មបទពិសោធន៍របស់អ្នកទស្សនាជាមួយនឹងមុខរបរប្រពៃណី។ ជាពិសេស កម្មវិធីទេសចរណ៍បទពិសោធន៍ភូមិសិប្បកម្ម ត្រូវបានបង្កើតឡើងដោយលោក និងសហការីយ៉ាងប៉ិនប្រសប់ ដោយនាំ យកបទពិសោធន៍ផ្សេងៗគ្នា ជូនភ្ញៀវទេសចរណ៍ និងអ្នកចាប់អារម្មណ៍។ ដំណើរកម្សាន្តនីមួយៗ មានសារអំពីការថែរក្សាតម្លៃវប្បធម៌ជាតិ និងបង្កប់ដោយព័ត៌មានយ៉ាងយកចិត្តទុកដាក់ ចំណេះដឹង រឿងរ៉ាវ ទាក់ទងយ៉ាងជិតស្និទ្ធជាមួយអ្នកដែលកតាប់ជាប់នូវភាពសម្បូរបែបនៃសិប្បកម្មប្រពៃណី។

ចំណង់ចំណូលចិត្ត និងភាពរីករាយរបស់ Ngo Quy Duc បានធ្វើឱ្យសិប្បករជាច្រើនមានជំនឿកាន់តែច្រើនលើតម្លៃប្រជាជននិងសារៈសំខាន់នៃសិប្បកម្មដែលនឹងស្ថិតស្ថេរជារៀងរហូត។ អ្នកស្រី Dang Huong Lan ដែលជាវិចិត្រករបិទមុខក្រដាសតែមួយគត់ដែលនៅសេសសល់នៃវិថីបុរាណទីក្រុងហាណូយ បានចាត់ទុក Ngo Quy Duc ជាកូនប្រុស និងដៃគូរបស់គាត់។

“កូនខ្ញុំមិនបន្តអាជីពទេ ហើយចៅក៏មិនបន្តអាជីពដែរ។ ឥឡូវយើងទុកចិត្តតែ Ngo Quy Duc ហើយប្រគល់វិជ្ជាជីវៈឱ្យ Duc។ បង្រៀនឲ្យពីរបៀបបង្កើតពុម្ភ និងបច្ចេកទេសសិប្បកម្ម”។

ការចំណាយយុវវ័យរបស់ខ្លួនលើគម្រោង "វិលត្រឡប់ទៅភូមិវិញ" របស់ Ngo Quy Duc នៅតែមិនឈប់ទេ ប៉ុន្តែបន្តចាប់ផ្តើមគម្រោងថ្មី “សង្កាត់ Bach Nghe”។ យុវជនម្នាក់នេះចង់បន្តបំផុសនិងផ្សព្វផ្សាយការអភិរក្សនូវតម្លៃវប្បធម៌ប្រជាប្រិយ ភាពសម្បូរបែពនៃវប្បធម៌ជាតិ ដែលត្រូវបានថែរក្សា និងទទួលមរតកជាច្រើនជំនាន់។

“សិប្បករបានបង្កើត បង្ហាញពីគំនិត និងសេចក្តីប្រាថ្នារបស់ខ្លួន តាមរយៈសិប្បកម្មប្រពៃណី។ ដូច្នេះខ្ញុំគិតថា ខ្លួនត្រូវមានទំនួលខុសត្រូវហើយក៏ជាកិត្តិយសសម្រាប់មុខរបរប្រពៃណីនេះដែរ។ ក្នុងដំណើរទៅភូមិ១៨ឆ្នាំ វិលត្រឡប់ទៅភូមិវិញ ខ្ញុំបានបង្កើតទំនាក់ទំនងជិតស្និទ្ធជាមួយប្រជាជនក្នុងភូមិ។ អ្នកភូមិចាត់ទុកខ្ញុំជាកូនចៅក្នុងគ្រួសារ ហើយសប្បាយចិត្តណាស់ដែលដឹងថាខ្ញុំត្រឡប់មកភូមិវិញ។ អ្វីដែលខ្ញុំចង់បានគឺលើកកម្ពស់ផលិតផលសិប្បកម្មវៀតណាមមិនត្រឹមតែក្នុងប្រទេសប៉ុណ្ណោះទេថែមទាំងនាំមកនូវភាពសម្បូរបែបរបស់ភូមិរបរវៀតណាមទៅកាន់ពិភពលោក”។

គម្រោង “វិលត្រឡប់មកភូមិវិញ” ត្រូវបានផ្តួចផ្តើមឡើងដោយ Ngo Quy Duc ដោយមានកិច្ចសហការពីយុវជនជាច្រើនដែលជានិស្សិតផ្នែកសេដ្ឋកិច្ច ទំនាក់ទំនង វិចិត្រសិល្បៈ សារព័ត៌មាន ... ដែលចែករំលែកក្តីស្រឡាញ់ចំពោះវប្បធម៌ប្រពៃណីជាតិ។ បំណងធំបំផុតរបស់លោក Ngo Quy Duc គឺនាំយកផលិតផលគុណភាពខ្ពស់ និងសម្បូរបែពនៃភូមិសិប្បកម្មវៀតណាម ទៅកាន់ភ្ញៀវទេសចរណ៍ជាតិ និងអន្តរជាតិយ៉ាងច្រើនកុះករ។ លោក Ngo Quy Duc មានកិត្តិយសដែលបានទទួលងារជាពលរដ្ឋរដ្ឋធានីឆ្នាំ ២០១៧ សម្រាប់ការលះបង់ និងការួមវិភាគទានលើទឹកស្រុកកំណើតដែលលោកបានកើត និងធំធាត់៕