ໝູ່ບ້ານປູກຕົ້ນໝາກແປ້ນ ຕືລຽນ-ຮ່າໂນ້ຍ (ພາບ: VTC News)

ໃນຊຸມມື້ນີ້, ບັນດາຍາກາດບຸນເຕັດໄດ້ເຫັນຢູ່ທຸກຖະໜົນຫົນທາງໃຫຍ່ນ້ອຍໃນບັນດາແຂວງນະຄອນໃນທົ່ວປະເທດແລ້ວ. ພິເສດ, ຕະຫຼາດຂາຍຕົ້ນແປ້ນປະດັບໄດ້ເລີ່ມກ້າວເຂົ້າເວລາຈຸດສຸມ. ນັບແຕ່ຍາມຮຸ່ງເຊົ້າຕະຫຼອດຮອດຍາມຄ່ຳຄືນ, ຜູ້ຊື້ຜູ້ຂາຍກໍ່ໄປມາຢ່າງຄັບຄາໜາແໜ້ນ. ບໍ່ພຽງແຕ່ແມ່ນຕົ້ນໄມ້ປະດັບເທົ່ານັ້ນ, ຕົ້ນແປ້ນຍັງແມ່ນສັນຍາລັກຂອງບັນຍາກາດຍາມບຸນເຕັດອີກດ້ວຍ.

ຕົ້ນໝາກແປ້ນຮູບມ້າ 8 ໂຕຂອງສວນຕົ້ນໄມ້ປະດັບ ຮຶງເຕິມ ແຂວງ ຮຶງອຽນ (ພາບ: TTXVN

ຢູ່ ເມ້ເສີ, ແຂວງ ຮຶງອຽນ, ເຈົ້າຂອງສວນຕົ້ນແປ້ນໄດ້ເຮັດບັນດາແບບຕົ້ນປະດັບພິເສດເພື່ອຕ້ອນຮັບລະດູບານໃໝ່ປີມະເມຍ 2026 ດ້ວຍຮູບໂຕມ້າ ຫຼືທັງຝູງມ້າທີ່ຄາດວ່າຈະມີລາຄາແຕ່ 15.000-17.000 USD ໂດຍຂຶ້ນກັບແຕ່ລະແບບ ແລະ ຄວາມລະອຽດລະອໍ. ເອື້ອຍ ເຈືອງໝີ້ເຕິມ, ເຈົ້າຂອງສວນຕົ້ນໄມ້ປະດັບ ຮຶງເຕິມ ແຂວງ ຮຶງອຽນ ແບ່ງປັນວ່າ:

ຜົນງານມ້າມົງຄົນຂອງສວນແມ່ນໃຫຍ່ ແລະ ຍາວທີ່ສຸດ ດ້ວຍລວງຍາວ 8,9m ສູງ 3m, ມີໂຕມ້າ 8 ໂຕ. ຕໍ່ໄປແມ່ນຕົ້ນແປ້ນທີ່ມ້າໂຕໜຶ່ງແກ່ຖົງເງິນ, ໂຕໜຶ່ງແກ່ທ່ອນຄຳ. ນອກຈາກນັ້ນຍັງມີຕົ້ນແປ້ນມ້າຄູ່.

(ພາບ: VTC News)

ຕາມການຕີລາຄາຂອງເຈົ້າຂອງສວນຫຼາຍຄົນ, ປີນີ້, ດິນຟ້າອາກາດເອື້ອອຳນວຍພໍສົມຄວນ, ດັ່ງນັ້ນ, ຕົ້ນແປ້ນມີໝາກຫຼາຍ, ໃບຂຽວ, ໜ່ວຍສີເຫຼືອງງາມຕາ….

ຈາກບັນດາສວນຕົ້ນແປ້ນ, ລົດແຕ່ລະຖ້ຽວຕໍ່ກົ້ນກັນເພື່ອຂົນສົ່ງຕົ້ນແປ້ນໄປຕະຫຼາດດອກໄມ້, ຮ້ານຂາຍຕົ້ນໄມ້ປະດັບແຫ່ງຕ່າງໆຢູ່ພາຍໃນຕົວເມືອງ. ດັ່ງນັ້ນ, ຕະຫຼາດໃນເວລາໃກ້ຈະຮອດບຸນເຕັດປະຈຳຊາດພັດມີຄວາມຟົດຟື້ນຂຶ້ນຕື່ມ. ເອື້ອຍ ເຈືອງງອກແອັງ, ເຈົ້າຂອງຮ້ານຂາຍຕົ້ນແປ້ນປະດັບຢູ່ ຮ່າໂນ້ຍ ໃຫ້ຮູ້ວ່າ:

ປີນີ້ລະດູຕົ້ນແປ້ນໄດ້ຮັບຜົນດີ, ຕົ້ນງາມທີ່ສຸດ, ຄຸນນະພາບຕົ້ນແປ້ນຂອງສວນໃດກໍ່ເຊັ່ນດຽວກັນ, ລາຄາກໍ່ເທົ່າກັນ.

ຕາມບັນດາຜູ້ຂາຍແລ້ວ, ປະຈຸບັນ, ຜູ້ຊື້ຈະມັກເລືອກຕົ້ນໄມ້ທີ່ມີລາຄາເໝາະສົມ, ຕົ້ນທີ່ແຂງແຮງທົນທານ, ບົວລະບັດງ່າຍ, ຮັກສາໄດ້ດົນ...

ທ່ານ ຫງວຽນຮູຍຟຸກ, ຕາແສງ ແທັງລຽດ, ນະຄອນ ຮ່າໂນ້ຍ, ຜູ້ທີ່ມັກຕົ້ນແປ້ນປະດັບມາຫຼາຍປີ ໄດ້ຕີລາຄາວ່າ:

ຂ້າພະເຈົ້າຕີລາຄາວ່າ ຄຸນນະພາບໝາກແປ້ນປີນີ້ແມ່ນດີທີ່ສຸດ, ໝາກໃຫຍ່. ລາຄາແມ່ນບໍ່ສຳຄັນປານໃດ, ອາດຈະຖືກ ຫຼືແພງ ແຕ່ຖ້າມັກແລ້ວກໍ່ຊື້ໄປເລີຍ...

ຫຼາຍອົງການສຳນັກງານ, ວິສາຫະກິດກໍ່ໄດ້ຈອງຊື້ຕົ້ນແປ້ນນັບແຕ່ໄວເພື່ອປະດັບປະດາສຳນັກງານ, ຫ້ອງການ ຊື່ງໄດ້ເຮັດໃຫ້ຕະຫຼາດຕົ້ນແປ້ນປະດັບຍິ່ງມີຄວາມຟົດຟື້ນຂຶ້ນຕື່ມ.

ໃນຊຸມມື້ນີ້, ເມື່ອໄປຜ່ານຖະຫນົນສາຍຕ່າງໆ, ສີເຫຼືອງຂອງໝາກແປ້ນໄດ້ເປັນສັນຍານສະແດງໃຫ້ເຫັນວ່າ ລະດູບານໃໝ່ພວມວຽນມາແລ້ວ. ຕະຫຼາດຊື້ຂາຍຕົ້ນແປ້ນປະດັບບໍ່ພຽງແຕ່ແມ່ນແຫ່ງຊື້ຂາຍເທົ່ານັ້ນ, ຫາກຍັງແມ່ນແຫ່ງທີ່ທຸກຄົນສາມາດຮູ້ສຶກເຖິງຈັງຫວະຂອງບຸນເຕັດຢ່າງຈະແຈ້ງທີ່ສຸດໃນຊຸມວັນທີ່ລະດູບານໃໝ່ໃກ້ຈະວຽນມາ./.