ການຫຼິ້ນດອກໄມ້ ແລະ ຕົ້ນໄມ້ປະດັບໃນເມື່ອກ່ອນ

ນັບແຕ່ສະໄໝລ່າເມືອງຂຶ້ນຝລັ່ງຢືດຄອງ ຮ່າໂນ້ຍ, ຊາວເມືອງຫຼວງຈຶ່ງຮູ້ປັກດອກໄມ້ໃນໂຖ, ກ່ອນນັ້ນ, ດອກໄມ້ເພື່ອບູຊາແມ່ນວາງໃນຈານ, ສ່ວນດອກໄມ້ເພື່ອຫຼິ້ນແມ່ນປູກຢູ່ເດີນບ້ານ ຫຼືຢູ່ສວນ, ພ້ອມກັບດອກໄມ້ ແມ່ນຕົ້ນໄມ້ປະດັບ,

(vovworld) - ນັບແຕ່ສະໄໝລ່າເມືອງຂຶ້ນຝລັ່ງຢືດຄອງ ຮ່າໂນ້ຍ, ຊາວເມືອງຫຼວງຈຶ່ງຮູ້ປັກດອກໄມ້ໃນໂຖ, ກ່ອນນັ້ນ, ດອກໄມ້ເພື່ອບູຊາແມ່ນວາງໃນຈານ, ສ່ວນດອກໄມ້ເພື່ອຫຼິ້ນແມ່ນປູກຢູ່ເດີນບ້ານ ຫຼືຢູ່ສວນ, ພ້ອມກັບດອກໄມ້ ແມ່ນຕົ້ນໄມ້ປະດັບ, ນີ້ບໍ່ພຽງແຕ່ແມ່ນການລະຫຼິ້ນເທົ່ານັ້ນ, ຫາກຍັງແມ່ນວັດທະນະທຳທີ່ເປັນເອກະລັກສະເພາະຂອງດິນແດນແຫ່ງອະລິຍະທຳນັບພັນປີອີກດ້ວຍ.

ດອກໄມ້ທີ່ປູກໃນບ້ານງີຕ່າມ, ຮ່າໂນ້ຍ

ຮ່າໂນ້ຍ ໃນເມື່ອກ່ອນແມ່ນດິນແດນແຫ່ງດອກໄມ້. ໃນສະໄໝລາດຊະວົງຫຼີ, ບ້ານ ງີຕ່າມ ມີບັນດາທົ່ງດອກໄມ້ເອີ້ນວ່າ ທົ່ງບົງ. ຢູ່ບ້ານ ອຽນຟູ້ ປູກດອກໄມ້, ດັ່ງນັ້ນມີຊື່ວ່າ ອຽນຮວາ. ເວົ້າລວມແລ້ວ, ຢູ່ອ້ອມໜອງ ໂຮ່ໄຕ, ເກືອບຄືວ່າບ້ານໃດກໍ່ປູກດອກໄມ້. ສ່ວນຢູ່ທິດໃຕ້ເຂດແຄມເມືອງຫຼວງກໍ່ມີບ້ານປູກດອກເໝີຍຫຼາຍບ້ານ, ດັ່ງນັ້ນຈຶ່ງເອີ້ນວ່າບ້ານແບກມາຍ, ຮົ່ງມາຍ, ຮ່ວາງມາຍ… ມີບ້ານປູກດອກໄມ້ໝາຍຄວາມວ່າມີຜູ້ຫຼິ້ນດອກໄມ້ຢ່າງແນ່ນອນ.

ໃນເມື່ອກ່ອນເຮືອນໃນເມືອງຫຼວງຖືກສ້າງເປັນຮູບທໍ່, ທາງໜ້າເຮືອນອາດຈະຄັບແຄບ ແຕ່ພັດຍາວ, ລະຫວ່າງຫ້ອງຢູ່ເບື້ອງໜ້າ ແລະ ຫ້ອງເບື້ອງຫຼັງເຮືອນແມ່ນມີເດີນບ້ານ ແລະ ໃນເດີນບ້ານນີ້ເຂົາເຈົ້າເຄີຍວາງກະຖາງດອກໄມ້ ແລະ ຕົ້ນໄມ້ປະດັບ ເພື່ອສ້າງຄວາມງາມໃຫ້ເຮືອນ. ຜ່ານການເວລາ, ການຫຼິ້ນດອກໄມ້, ຕົ້ນໄມ້ປະດັບຢູ່ ທັງລອງ ກໍ່ມີການປ່ຽນແປງ ແລະ ກາຍເປັນສິລະປະ, ຍ້ອນເຫດນັ້ນ, ຜູ້ຫຼິ້ນດອກໄມ້ກໍ່ຕ້ອງຮູ້ເຕັກນິກປູກດອກໄມ້ຢ່າງລະອຽດ. ນອກນັ້ນເຂົາເຈົ້າຍັງຕ້ອງຮູ້ເຖິງສັນຍາລັກຂອງດອກໄມ້ແຕ່ລະຊະນິດອິກ.

ຊາວນະຄອນຫຼວງຮ່າໂນ້ຍມັກຫຼິ້ນດອກຄາຍໃນໂອກາດບຸນປີໃໝ່

ຢູ່ເຂດຊານເມືອງຫຼວງ ທັງລອງ, ບັນດາເຮືອນລ້ວນແຕ່ປະກອບດ້ວຍ: ເຮືອນຢູ່, ລະບຽງເຮືອນ, ເດີນ, ສວນ ແລະ ອ້ອມສວນເຄີຍປູກດອກຊະບາສີແດງ. ຈາກປະຕູໂຂງເຂົ້າເດີນບ້ານ, ຢູ່ລຽບຕາມສອງພາກທາງເຄີຍປູກດອກກຸຫຼາບ, ດອກພຸດ, ດອກຊ້ອນ. ຢູ່ຕໍ່ໜ້າລະບຽງເຮືອນກໍ່ປູກດອກໄມ້. ຫຼິ້ນດອກໄມ້ຕ້ອງຮູ້ວິທີເຮັດແນວໃດໃຫ້ມັນງາມກວ່າ. ບໍ່ພຽງແຕ່ຫຼິ້ນດອກໄມ້ເທົ່ານັ້ນ, ຊາວເມືອງຫຼວງ ທັງລອງ ຍັງຫຼິ້ນດອກໄມ້ປະດັບອີກ. ຕ່າງກັບດອກໄມ້ແມ່ນສີສັນ ແລະ ກິ່ນຫອມ, ການປູກດອກໄມ້ປະດັບຕ້ອງດັດປັບຄືແນວໃດໃຫ້ເປັນຮູບສັດປະເພດຕ່າງໆ, ຫຼືຮູບໃດໜຶ່ງທີ່ຜູ້ປູກນິຍົມ. ໂດຍອີງຕາມຄວາມນິຍົມຂອງແຕ່ລະຄົນ, ເຂົາເຈົ້າຈະເລືອກຊື້ ຫຼືປູກດອກໄມ້, ຕົ້ນໄມ້ປະດັບທີ່ເໝາະສົມ. ຄຽງຂ້າງຫຼິ້ນດອກໄມ້ ແລະ ຕົ້ນໄມ້ປະດັບແລ້ວ, ເຂົາເຈົ້າຍັງຫຼິ້ນນົກອັນລ້ຳຄ່າຫາຍາກ ແລະ ມີອ່າງລ້ຽງປາປະດັບອີກ. ສິ່ງດັ່ງກ່າວບໍ່ພຽງແຕ່ສະແດງໃຫ້ເຫັນສິລະປະເທົ່ານັ້ນ, ຫາກຍັງເວົ້າເຖິງອາລົມຈິດ, ແນວຄິດຈິດໃຈຂອງເຈົ້າຂອງອີກດ້ວຍ.

ຕາມການເວລາ, ການຫຼິ້ນດອກໄມ້, ຕົ້ນໄມ້ປະດັບກໍ່ມີການປ່ຽນແປງສ່ວນໃດສ່ວນໜຶ່ງ, ຍ້ອນມີດອກໄມ້ຫຼາຍຊະນິດແມ່ນຖືກນຳເຂົ້າຈາກຕ່າງປະເທດ. ຊາວ ຮ່າໂນ້ຍຍັງຮຽນວິທີຫຼິ້ນດອກໄມ້, ປັກດອກໄມ້ຈາດຝ່າຍຕາເວັນຕົກອີກດ້ວຍ, ເຮັດໃຫ້ການຫຼິ້ນດອກໄມ້ ແລະ ຕົ້ນໄມ້ປະດັບອຸດົມສົມບູນຕື່ມອີກ. ເຖິງຢ່າງໃດກໍ່ຕາມ, ຊາວ ຮ່າໂນ້ຍ ຍັງຄົງຮັກສາການຫຼິ້ນດອກໄມ້, ຕົ້ນໄມ້ປະດັບທີເປັນມູນເຊື້ອໄວ້ຈົນເຖິງປະຈຸບັນ.

Tag: vovworld ດອກໄມ້