ຕ້ອນຮັບບຸນປີໃຫມ່ປະຈຳຊາດຢູ່ ເກາະນ້ຳຖ້ວມເຈື່ອງຊາ

(vovworld)- ລະດູບານໃຫມ່ວຽນມາອີກວາລະຫນຶ່ງ ແລະ ຢູ່ເກາະທີ່ຫ່າງໄກ, ບັນດານັກຮົບຫານເຮືອ ພວມປະຕິບັດຫນ້າທີ່ຢູ່ ບັນດາເກາະນ້ຳຖ້ວມ

(vovworld)- ລະດູບານໃຫມ່ວຽນມາອີກວາລະຫນຶ່ງ ແລະ ຢູ່ເກາະທີ່ຫ່າງໄກ, ບັນດານັກຮົບຫານເຮືອ ພວມປະຕິບັດຫນ້າທີ່ຢູ່ ບັນດາເກາະນ້ຳຖ້ວມ ຂຶ້ນກັບໝູ່ເກາະ ເຈື່ອງຊາ, ເມືອງ ເຈື່ອງຊາ ແຂວງ ແຄງຮວາ ພວມພ້ອມກັນກະກຽມຕ້ອນຮັບບຸນເຕັດປີມະແມ 2015. ນອກຈາກບັນດາເຄື່ອງຂອງຈຳເປັນທີ່ນຳມາຈາກເຂດດິນຕໍ່ແຜ່ນຄື: ຊີ້ນງົວ, ເຂົ້າຫນຽວ, ໃບຕອງຈິງ, ຄຳກອນ… ບຸນເຕັດປີນີ້, ພະນັກງານ, ນັກຮົບ ຢູ່ບັນດາເກາະນ້ຳຖ້ວມ ຍັງປູກຜັກ ແລະ ລ້ຽງສັດໄດ້ຫລາຍ ຮັບປະກັນດ້ານອາຫານຢ່າງພຽງພໍເພື່ອຕ້ອນຮັບບຸນເຕັດດ້ວຍຄວາມອົບອຸ່ນ. ເພື່ອໃຫ້ພະນັກງານ, ນັກຮົບອຸ່ນອ່ຽນໃຈປົກປັກຮັກສາເຂດທະເລໝູ່ເກາະຂອງປະເທດຊາດ.

ນັກຮົບຢູ່ເກາະ ກະກຽມຕ້ອນຮັບບຸນເຕັດ
ພາບ:internet

ຕອນບ່າຍຂອງມື້ທ້າຍປີເກົ່າ ຢູ່ ເກາະ ດາທີ້, ຕັ້ງຢູ່ທິດເຫນືອເມືອງ ເກາະ ເຈື່ອງຊາ, ໃນເຮືອນຄົວນ້ອຍ, ພົນທະຫານຊັ້ນຫນຶ່ງ ຟ້າມຢູຍກວາງ ທັງເບິ່ງແຍງໝໍ້ເຂົ້າຕົ້ມ ທັງກະກຽມຜັກ, ຜັກບົວ…ເພື່ອຂົ້ວຊີ້ນງົວ, ເຊິ່ງແມ່ນໜຶ່ງໃນບັນດາເຍື່ອງອາຫານໃນພາເຂົ້າ. ຟ້າມຢູຍກວາງ ໃຫ້ຮູ້ວ່າ: ນີ້ເປັນຄັ້ງທຳອິດທີ່ລາວຕ້ອນຮັບບຸນເຕັດຢູ່ເກາະແຫ່ງນີ້, ເຖິງວ່າ ຫ່າງໄກຈາກຄອບຄົວ ແລະ ບໍ່ໄດ້ຕ້ອນຮັບບຸນເຕັດຢູ່ເຂດດິນຕໍ່ແຜ່ນກໍຕາມ, ແຕ່ອາລົມຈິດຄວາມຮັກແພງຂອງອ້າຍນ້ອງຮ່ວມກົມກອງຢູ່ເກາະ ໄດ້ເຮັດໃຫ້ລາວຮູ້ສຶກອົບອຸ່ນໃຈທີ່ສຸດ.

“ນີ້ເປັນຄັ້ງທຳອິດ ຂ້າພະເຈົ້າຕ້ອນຮັບບຸນເຕັດຢູ່ເກາະ ເຈື່ອງຊາ. ຂ້າພະເຈົ້າມານີ້ ໄດ້ 6 ເດືອນ ແລ້ວ, ຂ້າພະເຈົ້າເຫັນວ່າ ອ້າຍນອ້ງຮ່ວມກົມກອງຄືດັ່ງຄອບຄົວດຽວ ສະນັ້ນ ຕ້ອນຮັບບຸນເຕັດຢູ່ທີ່ນີ້ ຮູ້ສຶກບໍ່ເຫງົາ. ບຸນເຕັດປີນີ້ ກົມກອງກໍຈັດຕັ້ງການຫໍ່ເຂົ້າຕົ້ມ, ກະກຽມທຸກສິ່ງທຸກຢ່າງເພື່ອຕ້ອນຮັບບຸນເຕັດ. ອ້າຍນ້ອງໃນກົມກອງກໍຮູ້ສຶກເບິກບານມ່ວນຊື່ນທີ່ສຸດ.”

ຍ້ອນປະຕິບັດວຽກງານເພີ່ມພູນຜະລິດຜົນເປັນຢ່າງດີ, ສະນັ້ນ ບຸນເຕັດປີນີ້ ໃນຄາບອາຫານຂອງພະນັກງານ, ນັກຮົບ ບໍ່ພຽງແຕ່ມີຜັກຂຽວເທົ່ານັ້ນ ຫາກຍັງມີອາຫານສົດຈາກການລ້ຽງສັດໃນເກາະ ອີກດ້ວຍ. ຮ້ອຍໂທ ເລວັນເຕື໋ອງ, ພະນັກງານການເມືອງ ເກາະ ດາທີ້ ແບ່ງປັນວ່າ:

“ໂດຍໄດ້ຮັບຄວາມເອົາໃຈໃສ່ຈາກເຂດດິນຕໍ່ແຜ່ນ, ບຸນເຕັດຂອງພວກຂ້າພະເຈົ້າກໍມີທຸກສິ່ງທຸກຢ່າງ. ເຖິງວ່າ ບໍ່ຄືຢູ່ເຂດດິນຕໍ່ແຜ່ນ ແຕ່ຮັບປະກັນອາຫານຢ່າງພຽງພໍເພື່ອໃຫ້ພະນັກງານ, ນັກຮົບຕ້ອນຮັບບຸນເຕັດຢ່າງອົບອຸ່ນ.ນອກນັ້ນ ພວກຂ້າພະເຈົ້າ ຍັງຈັດຕັ້ງລາຍການບັນເທິງຄື: ການແຂ່ງຂັນໝາກຮຸກ, ການລະຫລິ້ນພື້ນເມືອງ… ເວລາສົ່ງທ້າຍປີເກົ່າ, ຕ້ອນຮັບປີໃຫມ່, ພວກຂ້າພະເຈົ້າຍັງໄດ້ຮັບຟັງຄຳອວຍພອນປີໃຫມ່ຈາກການນຳພັກ, ລັດ.”

ບັນດານັກຮົບຮັບເຄື່ອງຂອງຈາກເຂດດິນຕໍ່ແຜ່ນສົ່ງໃຫ້
ພາບ:vinhphong vov

ຢູ່ຫໍປະຊຸມໃນເກາະນ້ຳຖ້ວມ ດ໋ານາມ, ພະນັກງານ, ນັກຮົບພວມພ້ອມກັນເຮັດອະນາໄມ, ປະດັບປະດາ, ກະກຽມພາໝາກໄມ້, ດອກຄາຍ, ດອກເໝີຍທີ່ໄດ້ຮັບຈາກເຂດດິນຕໍ່ແຜ່ນ. ຮ້ອຍໂທ ຫວູວັນຄັກ, ພະນັກງານການເມືອງ ເກາະ ດ໋ານາມ ໃຫ້ຮູ້ວ່າ:

“ເປັນຄັ້ງທຳອິດທີ່ໄດ້ຕ້ອນຮັບບຸນເຕັດຢູ່ ເກາະ ດ໋ານາມ, ຂ້າພະເຈົ້າຮູ້ສຶກເປັນກຽດ ແລະ ຕື່ນເຕັ້ນທີ່ສຸດ ເມື່ອໄດ້ຕ້ອນຮັບບຸນເຕັດພ້ອມກັບພະນັກງານ, ນັກຮົບທີ່ມາຈາກຫລາຍເຂດພາກໃນທົ່ວປະເທດ. ສິ່ງດັ່ງກ່າວກໍເຮັດໃຫ້ຂ້າພະເຈົ້າບັນເທົາຄວາມຄິດຮອດຄິດເຖິງຄອບຄົວໄດ້ສ່ວນໃດສ່ວນໜຶ່ງ ແລະ ມີກຳລັງໃຈຕື່ມອີກເພື່ອສູ້ຊົນປະຕິບັດສຳເລັດຫນ້າທີ່ວຽກງານເຊິ່ງໄດ້ຮັບມອບໝາຍ.”

ຢູ່ເກາະນ້ຳຖ້ວມ ດ໋າດົງ, ດ໋າໄຕ, ດ໋າລາດ, ຕຽນໜື.. ບັນຍາກາດຕ້ອນຮັບລະດູບານໃຫມ່ກໍຟົດຟື້ນເຊັ່ນດຽວກັນຢູ່ບັນດາເກາະ ແລະ ເຂດດິນຕໍ່ແຜ່ນ. ພະນັກງານ, ນັກຮົບຜູ້ລະວຽກ ພ້ອມກັນກະກຽມຕ້ອນຮັບບຸນເຕັດທີ່ເຕັມໄປດ້ວຍອາລົມຈິດຄວາມຮັກແພງ. ພັນເອກ ໂງຢູຍໂດ໋, ຮອງຜູ້ບັນຊາການ ກອງພົນນ້ອຍ 146, ຊື່ງແມ່ນຜູ້ທີ່ປະຕິບັດວຽກງານຢູ່ເກາະນ້ຳຖ້ວມມາເປັນເວລາຫລາຍປີໃຫ້ຮູ້ວ່າ: ກ່ອນນີ້ 10 ປີ, ເກາະນ້ຳຖ້ວມ ຍັງປະສົບກັບຄວາມ ລຳບາກຂາດເຂີນຫລາຍ. ແຕ່ໃນຊຸມປີມໍ່ໆມານີ້ ໂດຍໄດ້ຮັບຄວາມເອົາໃຈໃສ່ຈາກພັກ, ລັດ, ກອງທັບ ແລະ ປະຊາຊົນໃນທົ່ວປະເທດ, ສະນັ້ນຊີວິດການເປັນຢູ່ຂອງພະນັກງານ, ນັກຮົບ ຢູ່ເກາະນ້ຳຖ້ວມ ມີການປັບປຸງດີຂຶ້ນ. ຢູ່ບັນດາເກາະນ້ຳຖ້ວມ ລ້ວນແຕ່ໄດ້ຮັບຊົມໂທລະພາບ, ຟັງວິທະຍຸກະຈາຍສຽງຫວຽດນາມ. ສະນັ້ນ ບັນຍາກາດຕ້ອນຮັບລະດູບານໃຫມ່ຢ່າງອົບອຸ່ນ ແລະ ຮູ້ສຶກຄືວ່າເກາະມີຄວາມໃກ້ຊິດກັບເຂດດິນຕໍ່ແຜ່ນກວ່າ. ພະນັກງານ, ນັກຮົບຢູ່ເກາະນ້ຳຖ້ວມ ມີຄວາມອຸ່ນອ່ຽນໃຈ, ເບິກບານມ່ວນຊື່ນ ແລະ ຕັດສິນໃຈຈະປະຕິບັດຫນ້າທີ່ວຽກງານທີ່ໄດ້ຮັບມອບໝາຍເປັນຢ່າງດີ.

“ຢູ່ທີ່ນີ້ ພະນັກງານ, ນັກຮົບ ລ້ວນແຕ່ຖືກັນເປັນຄອບຄົວດຽວ. ການນຳ, ຜູ້ບັນຊາການຄືດັ່ງຜູ້ເປັນພໍ່, ເປັນອ້າຍໃນຄອບຄົວ. ສະນັ້ນ ເມື່ອກະກຽມຕ້ອນຮັບບຸນເຕັດ, ບັນດາສະມາຊິກກໍມີຫນ້າທີ່ສະເພາະຂອງຕົນຄືດັ່ງໃນຄອບຄົວຫນຶ່ງ. ບັນຍາກາດຕ້ອນຮັບບຸນເຕັດຢູ່ທີ່ນີ້ມີຈຸດທີ່ເປັນເອກະລັກສະເພາະ ແລະ ເຕັມໄປດ້ວຍອາລົມຈິດຄວາມຮັກແພງ.”

ບຸນເຕັດຢູ່ເກາະ ເຈື່ອງຊາ, ເຖິງວ່າ ຫ່າງໄກຈາກບ້ານເກີດເມືອງນອນ, ຍາດຕິພີ່ນ້ອງກໍຕາມ, ແຕ່ບັນດາພະນັກງານ, ນັກຮົບ ຍາມໃດກໍຮູ້ສຶກອົບອຸ່ນ ຍ້ອນຄວາມສາມັກຄີ, ຮັກແພງ, ອຸມຊູຊ່ວຍເຫລືອເຊິ່ງກັນ ແລະກັນ ຂອງ “ຄອບຄົວນ້ອຍຢູ່ເກາະນ້ຳຖ້ວມ”. ພ້ອມກັບເຂດດິນຕໍ່ແຜ່ນ ແລະ ບັນດາເກາະຂຶ້ນກັບໝູ່ເກາະ ເຈື່ອງຊາ, ບັນດາເກາະນ້ຳຖ້ວມ ພວມຕ້ອນຮັບບຸນເຕັດຢ່າງອົບອຸ່ນ ໃນລະດູບານໃຫມ່ດ້ວຍຄວາມສະຫງົບສຸກ.